തിരുവനന്തപുരം: നവംബർ ഒന്നിന് സംസ്ഥാന സർക്കാർ അതിദാരിദ്ര്യമുക്ത കേരളം പ്രഖ്യാപിക്കാൻ ഒരുങ്ങുമ്പോൾ, അവകാശവാദത്തെ ചോദ്യംചെയ്ത് സാമ്പത്തിക വിദഗ്ധരും സാമൂഹിക പ്രവർത്തകരും രംഗത്തെത്തി. അതിദരിദ്രരെ നിർണയിച്ച മാനദണ്ഡങ്ങളും ആധികാരിക പഠനറിപ്പോർട്ടും പ്രസിദ്ധീകരിക്കണമെന്നാവശ്യപ്പെട്ട് അവർ സർക്കാരിന് തുറന്നകത്ത് നൽകി.
മുതിർന്ന സാമ്പത്തിക ശാസ്ത്രജ്ഞൻ ഡോ. എം.എ. ഉമ്മൻ, സിഡിഎസ് മുൻ ഡയറക്ടർ ഡോ. കെ.പി. കണ്ണൻ, ആർ.വി.ജി. മേനോൻ എന്നിവരുൾപ്പെടെയുള്ള പ്രമുഖർ ഈ കത്തിൽ ഒപ്പുവെച്ചിട്ടുണ്ട്.
“അഗതിമുക്ത കേരളമാണോ അതിദാരിദ്ര്യമുക്ത കേരളമാണോ സർക്കാർ പ്രഖ്യാപിക്കുന്നത്?” എന്നതാണ് അവരുടെ പ്രധാനചോദ്യം. ഇതിന്റെ വസ്തുതാപരമായ അടിസ്ഥാനമെന്തെന്ന് അവർ ചൂണ്ടിക്കാട്ടി.
കേന്ദ്രസർക്കാർ സൗജന്യമായി അരിയും ഗോതമ്പും നൽകുന്ന 5.29 ലക്ഷം മഞ്ഞ കാർഡ് ഉടമകളുണ്ട്. എന്നാൽ അതിദരിദ്രരുടെ എണ്ണം 64,006 ആയി കുറഞ്ഞതെങ്ങനെ എന്ന് വിദഗ്ധർ ചോദിക്കുന്നു.
“അവർ എല്ലാവരും അതിദാരിദ്ര്യത്തിൽ നിന്ന് കരകയറിയെങ്കിൽ അന്ത്യോദയ അന്നയോജനയിലെ ഗുണഭോക്താക്കൾ ഇല്ലാതായെന്നല്ലേ അർത്ഥം?” എന്നും അവർ ചോദ്യമുയർത്തുന്നു.
തദ്ദേശവകുപ്പ് നിർവചിക്കുന്ന അതിദരിദ്ര വിഭാഗത്തിൽ, ഒരുവരുമാനവുമില്ലാത്തവർ, രണ്ടുനേരം ഭക്ഷണം ലഭിക്കാത്തവർ, ആരോഗ്യസ്ഥിതി മോശമായവർ ഉൾപ്പെടുന്നു. അഗതികൾ എന്ന ഈ വിഭാഗത്തെയാണ് സർക്കാർ ‘അതിദരിദ്രർ’ എന്ന് വിശേഷിപ്പിക്കുന്നതോ എന്നും അവർ ചോദിച്ചു.
ആദിവാസി വിഭാഗങ്ങളിൽ അതിദാരിദ്ര്യം അനുഭവിക്കുന്ന 1.16 ലക്ഷം കുടുംബങ്ങളുണ്ടായിട്ടും പട്ടികയിൽ 6,400 കുടുംബങ്ങൾ മാത്രമാണ് ഉൾപ്പെടുത്തിയതെന്നും വിദഗ്ധർ ചൂണ്ടിക്കാട്ടി. “ശേഷിച്ചവരുടെ അതിദാരിദ്ര്യം ഇല്ലാതാക്കാൻ എന്ത് ഇന്ദ്രജാലമാണ് നടന്നത്?” എന്നതാണ് അവരുടെ ചോദ്യം.
ന്യൂ ഇന്ത്യൻ എക്സ്പ്രസ് മുൻ റെസിഡന്റ് എഡിറ്റർ എം.കെ. ദാസ്, ഡോ. എം.പി. മത്തായി, ഡോ. സി.പി. രാജേന്ദ്രൻ, ഡോ. മേരി ജോർജ്, ഡോ. സുനിൽമാണി, ഡോ. വി. രാമൻകുട്ടി, ഡോ. ജെ. ദേവിക, ഡോ. എൻ.കെ. ശശിധരൻപിള്ള തുടങ്ങി നിരവധി പ്രമുഖർ ഈ കത്തിൽ ഒപ്പുവെച്ചിട്ടുണ്ട്.
