സിപിഐയുടെ പിന്തുണ ഇല്ലാത്തത് സിപിഐഎമ്മിന് വലിയ വെല്ലുവിളി; വിമത സ്ഥാനാർഥിയും തലവേദന
പല്ലാരിമംഗലം (എറണാകുളം): വരാനിരിക്കുന്ന തദ്ദേശ തിരഞ്ഞെടുപ്പിന് മുന്നോടിയായി പല്ലാരിമംഗലം പഞ്ചായത്തിൽ ഇടതുമുന്നണിയിലെ ആശയക്കുഴപ്പം കനക്കുകയാണ്. സീറ്റ് വിഭജനത്തിൽ സിപിഐയെ പാടെ അവഗണിച്ചതോടെയാണ് യുഡിഎഫിനെ പിന്തുണയ്ക്കാനുള്ള ചർച്ചകൾ സിപിഐയിൽ സജീവമായിരിക്കുന്നത്.
സിപിഐയെ എൽഡിഎഫ് കൺവെൻഷനിൽ പങ്കെടുപ്പിച്ചില്ലെന്ന നടപടി പാർട്ടി ശക്തമായി എതിർത്തിരുന്നു. പല്ലാരിമംഗലത്തിന് അടുത്തുള്ള വാരപ്പെട്ടി പഞ്ചായത്തിൽ സീറ്റ് നൽകാമെന്നായിരുന്നു ആദ്യം സിപിഐയ്ക്ക് നൽകിയ വാഗ്ദാനം. എന്നാൽ അവസാന നിമിഷം അതും നൽകാതെ സിപിഐയെ പൂർണമായും പുറംതള്ളിയെന്നാണ് ആരോപണം.
“യുഡിഎഫിനെ പിന്തുണയ്ക്കുമോ എന്നത് മുകളിലെ നേതൃത്വമാണ് തീരുമാനിക്കുക. ഒന്നിനും ഞങ്ങളെ വിളിക്കുന്നുമില്ല, സഹകരിക്കുന്നുമില്ല” എന്നായിരുന്നു സിപിഐയുടെ ഔദ്യോഗിക പ്രതികരണം.
കഴിഞ്ഞ തവണ പല്ലാരിമംഗലത്ത് സിപിഐ രണ്ട് വാർഡുകളിൽ മത്സരിച്ചെങ്കിലും വിജയം നേടാൻ കഴിഞ്ഞിരുന്നില്ല. ഇത്തവണ സിപിഐയുടെ പിന്തുണ ലഭിക്കാതെ വരുന്നത് സിപിഐഎമ്മിന് വലിയ തിരിച്ചടിയാകും. ഇതിന് പുറമെ വിമത ഭീഷണിയും സിപിഐഎമ്മിനെ ആശങ്കയിൽ ആക്കിയിരിക്കുകയാണ്.
പല്ലാരിമംഗലം ഗ്രാമപഞ്ചായത്ത് വൈസ് പ്രസിഡന്റും സിപിഐഎം ലോക്കൽ കമ്മറ്റി അംഗവുമായ ഒ.ഇ. അബ്ബാസ് ഇത്തവണ റിബൽ സ്ഥാനാർഥിയായി മത്സരിക്കാനൊരുങ്ങുന്നുവെന്നാണ് വിവരം. ഇത് സിപിഐഎമ്മിന്റെ കണക്ക് കൂട്ടലിനെ കൂടുതൽ ബുദ്ധിമുട്ടിലാക്കും.
തദ്ദേശ തിരഞ്ഞെടുപ്പിന്റെ മുന്നോടിയായുള്ള ഈ അന്തർകക്ഷി വിരോധങ്ങൾ പല്ലാരിമംഗലത്തെ രാഷ്ട്രീയത്തിന് പുതിയ വഴിത്തിരിവുകൾ സൃഷ്ടിക്കാനാണ് സാധ്യത.
