കൊച്ചി: പാലിയേക്കരയിലെ ടോൾ പിരിവ് പുനരാരംഭിക്കുന്നതിൽ ഹൈക്കോടതി ഇന്ന് വിധി പറയും. മുരിങ്ങൂരിലെ സർവീസ് റോഡ് ഇടിഞ്ഞ സംഭവത്തിൽ ജില്ലാ കലക്ടർ കോടതിക്ക് റിപ്പോർട്ട് നൽകും. കലക്ടറുടെ റിപ്പോർട്ട് കൂടി പരിഗണിച്ചശേഷമായിരിക്കും ഡിവിഷൻ ബെഞ്ചിന്റെ തീരുമാനം.
ദേശീയ പാതയിലെ കടുത്ത ഗതാഗതക്കുരുക്കിനെത്തുടർന്ന് പാലിയേക്കരയിലെ ടോൾ പിരിവ് ഹൈക്കോടതി ഒരു മാസം മുമ്പ് തടഞ്ഞിരുന്നു. തുടർന്നു ടോൾ പുനരാരംഭിക്കുന്നതുമായി ബന്ധപ്പെട്ട ഇടക്കാല ഉത്തരവ് സെപ്റ്റംബർ 22-ന് ഉണ്ടാകുമെന്നാണ് പ്രതീക്ഷിച്ചിരുന്നത്, എന്നാൽ കോടതി ഉത്തരവ് പുറപ്പെടുവിക്കാതെ ഇന്നത്തേക്ക് മാറ്റിവെച്ചിരുന്നു.
കഴിഞ്ഞ ദിവസം കോടതി ചില വ്യവസ്ഥകളോടെ ടോൾ പുനരാരംഭിക്കാൻ അനുവദിക്കാമെന്ന പരാമർശം നടത്തിയിരുന്നു. പരാതിക്കാരനായ ഷാജി കോടങ്കണ്ടത്തിൽ പ്രതികരിച്ചത്: “ജനവികാരത്തിനൊപ്പമാണ് കോടതി. ടോൾ പുനസ്ഥാപിച്ചാൽ 50% മാത്രം ഈടാക്കാൻ അനുവാദം നൽകണം” എന്നാണ്.
ടോൾ പിരിവ് പുനരാരംഭിക്കാൻ ദേശീയപാത അതോറിറ്റി സുപ്രീംകോടതിയെ സമീപിച്ചിരുന്നുവെങ്കിലും അനുകൂല ഉത്തരവ് ലഭിച്ചിരുന്നില്ല. അതേസമയം, കടുത്ത ഗതാഗതക്കുരുക്കിന് പരിഹാരമായി സർവീസ് റോഡുകളുടെ അറ്റകുറ്റപ്പണി അവസാനഘട്ടത്തിലാണെന്ന് തൃശൂർ ജില്ലാ കലക്ടർ കഴിഞ്ഞ ദിവസം കോടതിയെ അറിയിച്ചു.
