ഡൽഹി: ബിഹാർ മന്ത്രി നിതിൻ നബിൻ ബിജെപിയുടെ ദേശീയ വർക്കിങ് പ്രസിഡൻ്റായി ചുമതലയേറ്റു. 45 വയസ്സിൽ ഈ പദവിയിലെത്തുന്ന ആദ്യ നേതാവെന്ന പ്രത്യേകതയും നിതിൻ നബിന് സ്വന്തമാണ്. ബിജെപി പാർലമെൻ്ററി ബോർഡിന്റെ തീരുമാനപ്രകാരം നടന്ന നിയമനം പാർട്ടിക്കുള്ളിൽ വലിയ ശ്രദ്ധ നേടുകയാണ്.
മുതിർന്ന ബിജെപി നേതാവും മുൻ എംഎൽഎയുമായ പരേതനായ നബിൻ കിഷോർ പ്രസാദ് സിൻഹയുടെ മകനാണ് നിതിൻ നബിൻ. അഞ്ചുതവണ എംഎൽഎയായ അദ്ദേഹം ബീഹാറിലെ ബങ്കിപൂർ നിയമസഭാ മണ്ഡലത്തെയാണ് പ്രതിനിധീകരിക്കുന്നത്. രണ്ട് തവണ ബീഹാർ സർക്കാരിൽ മന്ത്രിയായി സേവനമനുഷ്ഠിച്ചിട്ടുള്ള നിതിൻ നബിന് ഭരണ-സംഘടനാ രംഗങ്ങളിൽ സമ്പന്നമായ അനുഭവസമ്പത്തുണ്ട്.
ബീഹാറിൽ മന്ത്രിയായിരിക്കെ ഛത്തീസ്ഗഢിലെ ബിജെപി പാർട്ടി ഇൻചാർജായി പ്രവർത്തിച്ച നിതിൻ നബിന്റെ ഇടപെടലുകൾ ശ്രദ്ധേയമായിരുന്നുവെന്ന് സംഘടനാ നേതൃത്വം വ്യക്തമാക്കിയതായി എൻഡിടിവി റിപ്പോർട്ട് ചെയ്തു. പാർട്ടിയെ അടിത്തറ മുതൽ ശക്തിപ്പെടുത്താനുള്ള അദ്ദേഹത്തിന്റെ പ്രവർത്തന ശൈലി കേന്ദ്രനേതൃത്വത്തിന്റെ ശ്രദ്ധ പിടിച്ചുപറ്റിയിരുന്നു.
കയാസ്ത സമുദായത്തിൽപ്പെട്ട നിതിൻ നബിൻ, നിലവിലെ ബിജെപി അധ്യക്ഷൻ ജെ.പി. നദ്ദയുടെ പിൻഗാമിയാകാനുള്ള സാധ്യതയുള്ള നേതാക്കളിൽ ഒരാളായാണ് വിലയിരുത്തപ്പെടുന്നത്. അതോടൊപ്പം തന്നെ, ആ സ്ഥാനത്തേക്ക് പരിഗണിക്കപ്പെടുന്ന ഏറ്റവും പ്രായം കുറഞ്ഞ നേതാക്കളിൽ ഒരാളുമാണ് അദ്ദേഹം.
നിതിൻ നബിന്റെ നിയമനത്തെ അഭിനന്ദിച്ച് പ്രധാനമന്ത്രി നരേന്ദ്ര മോദി എക്സിൽ കുറിച്ചത് ഇങ്ങനെ:
“അദ്ദേഹം ചെറുപ്പക്കാരനും കഠിനാധ്വാനിയും ആയ നേതാവാണ്. സംഘടനാ രംഗത്ത് സമ്പന്നമായ പരിചയമുണ്ട്. ജനങ്ങളുടെ അഭിലാഷങ്ങൾ നിറവേറ്റാൻ അദ്ദേഹം സമർപ്പണത്തോടെ പ്രവർത്തിച്ചിട്ടുണ്ട്. വരും കാലങ്ങളിൽ അദ്ദേഹത്തിന്റെ ഊർജ്ജവും പ്രതിബദ്ധതയും പാർട്ടിയെ കൂടുതൽ ശക്തിപ്പെടുത്തും.”
നിതിൻ നബിന്റെ നേതൃത്വത്തിൽ ബിജെപി പുതിയ ഉയരങ്ങൾ കീഴടക്കും എന്ന ആത്മവിശ്വാസം പാർട്ടി അധ്യക്ഷൻ ജെ.പി. നദ്ദയും പ്രകടിപ്പിച്ചു.
