തൃശൂർ: തൃശൂർ വോട്ട് കൊള്ള വിവാദത്തിൽ പുതിയ വെളിപ്പെടുത്തൽ. വ്യാജ വോട്ടറായി പേര് ചേർത്തവരിൽ കേന്ദ്രമന്ത്രി സുരേഷ് ഗോപിയുടെ ഡ്രൈവർ എസ്. അജയകുമാറും ഉണ്ടെന്ന് പുറത്തുവന്നു. പൂങ്കുന്നത്തെ ക്യാപിറ്റൽ C4-ൽ താമസിക്കുന്നതായി രേഖപ്പെടുത്തിയിട്ടുണ്ടെങ്കിലും, അദ്ദേഹം തിരുവനന്തപുരം സ്വദേശിയാണ്. അയൽവാസികൾ മാധ്യമങ്ങളോട് പറഞ്ഞതനുസരിച്ച്, അജയകുമാർ വർഷങ്ങളായി സുരേഷ് ഗോപിയുടെ ഡ്രൈവറായി ജോലി ചെയ്യുന്നു.
നിയമസഭയും തദ്ദേശ തെരഞ്ഞെടുപ്പും ഉൾപ്പെടെ വോട്ടർ പട്ടികയിൽ അജയകുമാറിന്റെ വോട്ട് തിരുവനന്തപുരത്താണെന്നതിന് തെളിവുകളും ലഭിച്ചു. വോട്ടർ ഐഡി നമ്പർ അടിസ്ഥാനമാക്കിയുള്ള അന്വേഷണത്തിലാണ് ഈ കള്ളപ്പണി പുറത്തായത്. പൂങ്കുന്നത്തെ ഫ്ലാറ്റ് ഉടമക്ക് അദ്ദേഹത്തെ താമസക്കാരനായി അറിയില്ലെന്നും വ്യക്തമായി.
കഴിഞ്ഞ നിയമസഭാ തെരഞ്ഞെടുപ്പിൽ അജയകുമാറിന്റെ പോളിംഗ് ബൂത്ത് ശാസ്തമംഗലത്തെ എൻഎസ്എസ് എച്ച്എസ്എസിലായിരുന്നു. ഇപ്പോഴും തദ്ദേശ തെരഞ്ഞെടുപ്പിനുള്ള കരട് പട്ടികയിൽ അതേ വിലാസവും പോളിംഗ് സ്റ്റേഷനും നിലനിൽക്കുന്നു.
അതേസമയം, വ്യാജ വോട്ടുകൾ ചേർത്ത സംഭവത്തിൽ മുൻ ബൂത്ത് ലെവൽ ഓഫീസർ ആനന്ദ് സി. മേനോൻ പ്രതികരിച്ചു. “ചട്ടപ്രകാരം പരിശോധന നടത്തി മാത്രമാണ് വോട്ടർമാരെ ചേർത്തത്. പട്ടികയിൽ വ്യാജന്മാർ ഇടം നേടിയിട്ടുണ്ടെങ്കിൽ എങ്ങനെയെന്ന് അറിയില്ല. ആദ്യമായാണ് ബിഎൽഒ ചുമതല നിർവഹിച്ചത്, പരിചയക്കുറവ് ഉണ്ടായിരുന്നു” — അദ്ദേഹം വ്യക്തമാക്കി.
