ന്യൂഡൽഹി: താൻ ദിവസേനയുള്ള ജോലിക്കായി മൊബൈൽ ഫോണോ ഇന്റർനെറ്റോ ഉപയോഗിക്കാറില്ലെന്ന് ദേശീയ സുരക്ഷാ ഉപദേഷ്ടാവ് (NSA) അജിത് ഡോവൽ വ്യക്തമാക്കി. വികസിത് ഭാരത് യങ് ലീഡേഴ്സ് ഡയലോഗ് 2026ൽ പങ്കെടുത്ത് യുവാക്കളുമായി സംവദിക്കുമ്പോഴായിരുന്നു അദ്ദേഹത്തിന്റെ പരാമർശം.
മൊബൈലും ഇന്റർനെറ്റും ഉപയോഗിക്കാറില്ലേ എന്ന ചോദ്യത്തിന് മറുപടിയായാണ് ഡോവൽ ഇക്കാര്യം വ്യക്തമാക്കിയത്. താൻ സാധാരണയായി മൊബൈൽ ഫോണും ഇന്റർനെറ്റും ഉപയോഗിക്കുന്നില്ലെന്നും, കുടുംബാംഗങ്ങളോടോ വിദേശത്തുള്ളവരോടോ സംസാരിക്കേണ്ടിവരുന്ന പ്രത്യേക സാഹചര്യങ്ങളിൽ മാത്രമാണ് മൊബൈൽ ഫോണിന്റെ സഹായം തേടുന്നതെന്നും അദ്ദേഹം പറഞ്ഞു.
ഇവയൊന്നും ഉപയോഗിക്കാതെയാണ് തന്റെ ജോലികൾ നിർവഹിക്കുന്നതെന്നും, ആശയവിനിമയത്തിനായി മറ്റ് നിരവധി മാർഗങ്ങൾ നിലവിലുണ്ടെന്നും ഡോവൽ വ്യക്തമാക്കി. കൂടാതെ പൊതുവേ ആളുകൾക്ക് അറിയാത്ത ചില അധിക സംവിധാനങ്ങളും ക്രമീകരിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു.
മുൻ ഐപിഎസ് ഉദ്യോഗസ്ഥനായ അജിത് ഡോവൽ, വർഷങ്ങളോളം ഇന്റലിജൻസ്, ആഭ്യന്തര സുരക്ഷ, തീവ്രവാദ വിരുദ്ധ പ്രവർത്തന മേഖലകളിൽ സേവനമനുഷ്ഠിച്ച ശേഷമാണ് രാജ്യത്തിന്റെ ദേശീയ സുരക്ഷാ ഉപദേഷ്ടാവായി ചുമതലയേറ്റത്.
