തിരുവനന്തപുരം: സംസ്ഥാനത്ത് വീണ്ടും അമീബിക്ക് മസ്തിഷ്ക ജ്വരം മൂലം മരണം. തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലായിരുന്ന പോത്തൻകോട് സ്വദേശിയാണ് മരിച്ചത്. 78 വയസായിരുന്നു. കഴിഞ്ഞ രണ്ട് ദിവസത്തിനിടെ തലസ്ഥാനത്ത് ഇതേ രോഗം മൂലം രണ്ടുപേരാണ് മരിച്ചത്.
ആരോഗ്യവകുപ്പിന്റെ പഠനങ്ങൾ എങ്ങുമെത്താത്ത സാഹചര്യത്തിലാണ് രോഗബാധിതരുടെ എണ്ണം കുതിച്ചുയരുന്നത്. രോഗബാധയ്ക്ക് പാരിസ്ഥിതിക മാറ്റങ്ങൾ കാരണമാകുന്നുണ്ടോ എന്നതിൽ വ്യക്തതയില്ല. രോഗവ്യാപനം നിയന്ത്രിക്കാൻ ആവശ്യമായ പഠനം പോലും ഇതുവരെ ആരംഭിച്ചിട്ടില്ല.
കഴിഞ്ഞ വർഷം ആകെ 38 പേർക്കാണ് അമീബിക്ക് മസ്തിഷ്ക ജ്വരം ബാധിച്ചതെങ്കിൽ, ഈ വർഷം ഇതുവരെ 129 കേസുകളാണ് റിപ്പോർട്ട് ചെയ്തത്. അപൂർവ്വരോഗമായി ലോകത്ത് തന്നെ വിരളമായി കാണപ്പെടുന്ന ഈ രോഗം, കേരളത്തിൽ ദിവസേന രണ്ടും മൂന്നും പേരിൽ വീതം സ്ഥിരീകരിക്കപ്പെടുകയാണ്.
ആരോഗ്യമന്ത്രി പ്രഖ്യാപിച്ച പഠനത്തിന് ഒന്നരമാസം കഴിഞ്ഞിട്ടും മുന്നോട്ടുപോക്കില്ല. ഡിഎച്ച്എസ്, ഡിഎംഇ, ഐസിഎംആർ എന്നീ സ്ഥാപനങ്ങൾ ചേർന്ന് നടത്തേണ്ട കേസ് കൺട്രോൾ സ്റ്റഡി ഇപ്പോഴും പ്രാരംഭാവസ്ഥയിലാണ്. ഫീൽഡിൽ നിന്നുള്ള വിവരശേഖരണവും തുടങ്ങിയിട്ടില്ല. പഠനം പൂർത്തിയാകുന്ന സമയത്തേക്കുറിച്ച് വ്യക്തതയുമില്ല.
പാരിസ്ഥിതിക മാറ്റങ്ങൾ രോഗബാധയിൽ പങ്കുവഹിക്കുന്നുണ്ടോയെന്നത് പ്രധാനമായ സംശയമായി തുടരുന്നു. സിഇടിയിലെ എൻവയോൺമെന്റൽ എഞ്ചിനീയറിംഗ് വിഭാഗവും പരിസ്ഥിതി മലിനീകരണ നിയന്ത്രണ ബോർഡും ആരോഗ്യവകുപ്പും ചേർന്ന് പഠനം നടത്തുമെന്നായിരുന്നു പ്രഖ്യാപനം, പക്ഷേ ആ പഠനം നടന്നുകൊണ്ടിരിക്കുകയാണോ എന്നും വ്യക്തമല്ല.
ഈ മാസം മാത്രം 41 പുതിയ കേസുകളും അഞ്ച് മരണങ്ങളും സംസ്ഥാനത്ത് റിപ്പോർട്ട് ചെയ്തിട്ടുണ്ട്. സ്വിമ്മിംഗ് പൂളുകൾ, കുളങ്ങൾ, കിണറുകൾ, ടാങ്കുകൾ തുടങ്ങിയവ രോഗവാഹിനികളാകുന്ന സാഹചര്യമാണുള്ളത്.
മസ്തിഷ്കജ്വരം സ്ഥിരീകരിക്കുന്ന എല്ലാ കേസുകളിലും ഇപ്പോൾ അമീബിക് പരിശോധന പ്രത്യേകം നടത്തുന്നുണ്ടെന്നും അതാണ് രോഗങ്ങൾ കൂടുതലായി കണ്ടെത്താൻ കാരണമാകുന്നതെന്നും ആരോഗ്യവകുപ്പ് വ്യക്തമാക്കിയിട്ടുണ്ട്. എന്നാൽ രോഗത്തിന്റെ ഉറവിടം ഇപ്പോഴും അവ്യക്തമായിരിക്കുന്നു. രോഗനിയന്ത്രണത്തിനായി വിവിധ വകുപ്പുകളുടെ ഏകോപനം അത്യാവശ്യമാണ് എന്ന് വിദഗ്ധർ പറയുന്നു.
[Reporter: Malayalam Pulse.in | Thiruvananthapuram Bureau]
