ആലപ്പുഴ: അരൂർ–തുറവൂർ ദേശീയപാതയിലെ ഉയരപ്പാത മേഖലയിൽ ഗർഡർ വീണ് പിക്കപ് വാൻ തകർന്ന് ഡ്രൈവർ മരണപ്പെട്ടതായി റിപ്പോർട്ട്. ആലപ്പുഴ ഹരിപ്പാട് സ്വദേശിയായ രാജേഷ് (വയസ്സ് ലഭ്യമല്ല) ആണ് മരിച്ചത്. പുലർച്ചെ രണ്ടരയോടെയാണ് അപകടം ഉണ്ടായത്.
ഗർഡർ സ്ഥാപിക്കുന്നതിനിടെയാണ് അപകടമുണ്ടായത്. രണ്ട് ഗർഡറുകളാണ് വീണത് – ഒന്ന് പൂർണമായും മറ്റൊന്ന് ഭാഗികമായും വാനിന് മുകളിലേക്ക് പതിച്ചു. മുട്ട കൊണ്ടുപോകുകയായിരുന്നു പിക്കപ് വാൻ.
അപകടത്തെ തുടർന്ന് അരൂർ–തുറവൂർ ഉയരപ്പാത മേഖലയിലുടനീളം ഗതാഗത നിയന്ത്രണം ഏർപ്പെടുത്തി. ആലപ്പുഴ ഭാഗത്ത് നിന്ന് എറണാകുളം ഭാഗത്തേക്ക് വാഹനങ്ങൾ കടത്തി വിടുന്നില്ല. ചേർത്തല എക്സറേ ജംഗ്ഷനിൽ നിന്ന് പൂച്ചാക്കൽ വഴി വാഹനങ്ങളെ തിരിച്ചുവിടുകയാണ് ചെയ്യുന്നത്. ആലപ്പുഴ ഭാഗത്തേക്ക് പോകുന്നവർ അരൂക്കുറ്റി വഴി മാറിനടക്കണമെന്ന് പൊലീസ് അറിയിച്ചു.
ദേശീയപാത അതോറിറ്റി ഉദ്യോഗസ്ഥരും പൊലീസും സ്ഥലത്തെത്തി രക്ഷാപ്രവർത്തനങ്ങൾ പുരോഗമിക്കുന്നു.
