സ്റ്റേഷനുകൾ: ആദ്യഘട്ടത്തിൽ 14 സ്റ്റേഷനുകൾ, പിന്നീട് 22 ആക്കി ഉയർത്തും. കാസർകോടിനെ നിലവിൽ ഒഴിവാക്കി.
• യാത്രാ സമയം: തിരുവനന്തപുരം – കോഴിക്കോട് (2.5 മണിക്കൂർ), തിരുവനന്തപുരം – കണ്ണൂർ (3.15 മണിക്കൂർ).
• നിർമ്മാണം: 70% എലിവേറ്റഡ് പാത, 20% ടണൽ. 5 വർഷത്തിനുള്ളിൽ പൂർത്തിയാക്കാൻ ലക്ഷ്യം.
• ചെലവ്: 86,000 കോടി മുതൽ 1 ലക്ഷം കോടി രൂപ വരെ. കേന്ദ്രവും സംസ്ഥാനവും തുല്യമായി (51:49) ചെലവ് പങ്കിടും.
• ഭൂമി ഏറ്റെടുക്കൽ: തൂണുകൾക്കായി ഏറ്റെടുക്കുന്ന ഭൂമി നിർമ്മാണത്തിന് ശേഷം വ്യവസ്ഥകളോടെ ഉടമകൾക്ക് തിരികെ നൽകും.
മലപ്പുറം: അതിവേഗ റെയിൽപാത പദ്ധതിക്കായുള്ള ഓഫീസ് പൊന്നാനിയിൽ സജ്ജമായതായി ഡിഎംആർസി മുൻ മുഖ്യ ഉപദേഷ്ടാവ് ഇ. ശ്രീധരൻ. ഫെബ്രുവരി രണ്ടാം തീയതി ഓഫീസ് പ്രവർത്തനം ആരംഭിക്കുമെന്നും പതിനഞ്ച് ദിവസത്തിനകം പദ്ധതിയുടെ ഔദ്യോഗിക പ്രഖ്യാപനം ഉണ്ടാകുമെന്നും അദ്ദേഹം അറിയിച്ചു. പാലക്കാട് നടത്തിയ വാർത്താസമ്മേളനത്തിലാണ് ശ്രീധരൻ ഇക്കാര്യം വ്യക്തമാക്കിയത്.
റെയിൽവേയുടെ നിർദേശപ്രകാരം സമയം കളയാതെ പദ്ധതി മുന്നോട്ട് കൊണ്ടുപോകാനാണ് തീരുമാനമെന്ന് ശ്രീധരൻ പറഞ്ഞു. ആദ്യ ഘട്ടത്തിൽ 14 സ്റ്റേഷനുകളാണ് ഉൾപ്പെടുത്തുക. പിന്നീട് ഇത് 22 ആയി ഉയർത്തും. ആദ്യ സ്റ്റോപ്പ് തിരുവനന്തപുരമായിരിക്കും.
തിരുവനന്തപുരത്ത് നിന്ന് കണ്ണൂർ വരെ സ്റ്റേഷനുകൾ: തിരുവനന്തപുരം എയർപോർട്ട്, വർക്കല, കൊല്ലം, കൊട്ടാരക്കര, അടൂർ, ചെങ്ങന്നൂർ, കോട്ടയം, എറണാകുളം, ആലുവ, തൃശൂർ, കുന്നംകുളം, എടപ്പാൾ, തിരൂർ, മലപ്പുറം (കരിപ്പൂർ), കോഴിക്കോട്, കൊയിലാണ്ടി, വടകര, തലശ്ശേരി, കണ്ണൂർ എന്നിവയാകും. എറണാകുളത്ത് ബൈപ്പാസിനോട് ചേർന്നായിരിക്കും സ്റ്റേഷൻ.
കാസർകോട് ഭാഗത്ത് നിന്ന് യാത്രക്കാർ കുറവായതിനാൽ നിലവിൽ സ്റ്റേഷൻ ഒഴിവാക്കിയതായി ശ്രീധരൻ പറഞ്ഞു. കാസർകോട് ചേർക്കണമെങ്കിൽ 200 കോടി രൂപ അധിക ചെലവ് വരുമെന്നും വ്യക്തമാക്കി.
ട്രെയിനിന്റെ പരമാവധി വേഗത 200 കിലോമീറ്ററായിരിക്കും. അതിവേഗ റെയിൽപാത യാഥാർഥ്യമായാൽ തിരുവനന്തപുരം–കോഴിക്കോട് യാത്രയ്ക്ക് രണ്ടര മണിക്കൂറും തിരുവനന്തപുരം–കണ്ണൂർ യാത്രയ്ക്ക് 3.15 മണിക്കൂറും മാത്രമേ വേണ്ടിവരൂ. തിരുവനന്തപുരം–കൊച്ചി യാത്ര 1.20 മണിക്കൂറായി ചുരുങ്ങും.
ആദ്യഘട്ടത്തിൽ എട്ട് കോച്ചുകളുള്ള ട്രെയിനുകളിൽ 560 യാത്രക്കാർക്ക് യാത്ര ചെയ്യാൻ സൗകര്യമുണ്ടാകും. അഞ്ച് മിനിറ്റിൽ ഒരിക്കൽ ട്രെയിൻ സർവീസ് ഉണ്ടാകും. നിലവിലെ നിരക്കിനെക്കാൾ ചെറിയ വർധന മാത്രമേ ഉണ്ടാകൂ എന്നും അദ്ദേഹം പറഞ്ഞു.
പാതയുടെ 70 ശതമാനം എലിവേറ്റഡായിരിക്കും, 20 ശതമാനം ടണലായിരിക്കും. ആവശ്യത്തിന് മാത്രം ഭൂമി ഏറ്റെടുക്കും. പണി പൂർത്തിയായ ശേഷം ഭൂമി വ്യവസ്ഥകളോടെ ഉടമയ്ക്ക് തിരികെ നൽകുമെന്നും ശ്രീധരൻ വ്യക്തമാക്കി. ഭൂമി ഏറ്റെടുക്കുന്ന ചുമതല സംസ്ഥാന സർക്കാരിനായിരിക്കും.
ആകെ 430 കിലോമീറ്റർ ദൈർഘ്യമുള്ള പദ്ധതിയുടെ ചെലവ് 86,000 കോടി രൂപയായി കണക്കാക്കുന്നു. ഇത് ഒരു ലക്ഷം കോടി വരെ ഉയരാം. ചെലവിന്റെ 51 ശതമാനം റെയിൽവേയും 49 ശതമാനം സംസ്ഥാനവും വഹിക്കും. അഞ്ച് വർഷത്തിനകം പദ്ധതി പൂർത്തിയാക്കാനാകുമെന്നും ശ്രീധരൻ പറഞ്ഞു.
അതിവേഗ റെയിൽപാത യാഥാർഥ്യമായാൽ റോഡ് അപകട മരണങ്ങൾ വൻതോതിൽ കുറയ്ക്കാനും മലിനീകരണം കുറയ്ക്കാനും സാധിക്കുമെന്ന് അദ്ദേഹം ചൂണ്ടിക്കാട്ടി. കെ-റെയിൽ പദ്ധതിയെക്കുറിച്ച് സംസ്ഥാന സർക്കാരിനോട് ചില ചോദ്യങ്ങളും ശ്രീധരൻ ഉന്നയിച്ചു.
