സനാതന ധർമ്മത്തെ അപമാനിക്കുന്നത് സഹിക്കാനാകില്ലെന്ന് പറഞ്ഞാണ് ആക്രമണശ്രമം; ബാർ കൗൺസിൽ സസ്പെൻഷൻ
ദില്ലി: സുപ്രീംകോടതി ചീഫ് ജസ്റ്റിസ് ബി.ആർ. ഗവായിക്കുനേരെ അഭിഭാഷകൻ രാകേഷ് കിഷോർ ഷൂ എറിയാൻ ശ്രമിച്ച സംഭവത്തിൽ നീതിപീഠം നടുങ്ങിയിരിക്കുകയാണ്. സംഭവത്തിന് പിന്നാലെ അറസ്റ്റ് ചെയ്ത അഭിഭാഷകൻ കുറ്റബോധമില്ലെന്ന് വ്യക്തമാക്കി.
“ശരിയെന്ന് തോന്നിയത് ചെയ്തതാണ്, ദൈവമാണ് പ്രേരണ. പ്രത്യാഘാതം നേരിടാൻ തയ്യാറാണ്,” എന്നായിരുന്നു രാകേഷ് കിഷോറിന്റെ പ്രതികരണം.
ഖജുരാഹോയിലെ വിഷ്ണു വിഗ്രഹം പുനഃസ്ഥാപിക്കുന്നതുമായി ബന്ധപ്പെട്ട കേസിൽ ചീഫ് ജസ്റ്റിസ് “അത് ദൈവത്തോട് പോയി പറയൂ” എന്ന് പറഞ്ഞത് ചില സംഘടനകളുടെ കോപത്തിന് ഇടയാക്കി. ഇതിനെത്തുടർന്നാണ് ആക്രമണശ്രമം.
സുരക്ഷാ ഉദ്യോഗസ്ഥർ സമയോചിതമായി തടഞ്ഞതോടെ വൻ അപകടം ഒഴിവായി. തുടർന്ന് കിഷോറിനെ പൊലീസിന് കൈമാറി. ചോദ്യം ചെയ്യലിന് ശേഷം അദ്ദേഹത്തെ വിട്ടയച്ചു. ഷൂവും രേഖകളും തിരികെ നൽകി.
സംഭവത്തെ പ്രധാനമന്ത്രി നരേന്ദ്രമോദിയും കോൺഗ്രസ് അധ്യക്ഷൻ മല്ലികാർജ്ജുൻ ഖർഗേയും ഉൾപ്പെടെയുള്ള നേതാക്കൾ അപലപിച്ചു. ബാർ കൗൺസിൽ രാകേഷ് കിഷോറിനെ സസ്പെൻഡ് ചെയ്ത് അച്ചടക്ക നടപടി ആരംഭിച്ചു.
