ഡൽഹി: കേന്ദ്രം ഭരിക്കുന്ന ബിജെപി സർക്കാർ നടപ്പാക്കുന്ന ജനവിരുദ്ധമായ എസ്ഐആറിനെതിരെ ഡൽഹിയിൽ കോൺഗ്രസ് വൻ മഹാറാലി സംഘടിപ്പിച്ചു. രാംലീല മൈതാനിയിൽ നടന്ന ജനകീയ റാലിയിൽ രാജ്യത്തിന്റെ വിവിധ ഭാഗങ്ങളിൽ നിന്നുള്ള ആയിരക്കണക്കിന് പ്രവർത്തകരും നേതാക്കളും പങ്കെടുത്തു. സമാധാനപരമായി കേന്ദ്ര സർക്കാരിനെതിരെയുള്ള പ്രതിഷേധം ശക്തമായി ഉയർത്തിക്കാട്ടുകയാണ് റാലിയുടെ ലക്ഷ്യം.
കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഖെ, മുതിർന്ന നേതാക്കളായ സോണിയാ ഗാന്ധി, രാഹുൽ ഗാന്ധി, പ്രിയങ്കാ ഗാന്ധി എന്നിവരും മഹാറാലിയിൽ പങ്കെടുത്തു. പൊതുസമ്മേളനത്തിൽ സംസാരിച്ച നേതാക്കൾ ബിജെപി സർക്കാരിനെയും തെരഞ്ഞെടുപ്പ് കമ്മീഷനെയും ശക്തമായി വിമർശിച്ചു.
രാജ്യത്ത് ബിജെപി വോട്ട് കൊള്ളയിലൂടെയാണ് അധികാരത്തിൽ തുടരുന്നതെന്ന് മല്ലികാർജുൻ ഖാർഖെ ആരോപിച്ചു. ജനങ്ങൾ ഒറ്റക്കെട്ടായി ഉയർന്നാൽ ബിജെപിയെ ഭരണത്തിൽ നിന്ന് താഴെയിറക്കാൻ കഴിയുമെന്നും അദ്ദേഹം പറഞ്ഞു. ആർഎസ്എസ് നിയന്ത്രിക്കുന്ന സർക്കാരിനെ ഇന്ത്യയുടെ ഭരണത്തിൽ നിന്ന് പുറത്താക്കുമെന്ന പ്രഖ്യാപനവുമായാണ് രാഹുൽ ഗാന്ധി രംഗത്തെത്തിയത്. സത്യത്തെയും അഹിംസയെയും ആയുധമാക്കി മോദിയേയും അമിത് ഷായേയും അധികാരത്തിൽ നിന്ന് മാറ്റുമെന്നും രാഹുൽ വ്യക്തമാക്കി.
വോട്ട് ചോരി വിഷയത്തിൽ പാർലമെന്റിൽ ചർച്ച നടത്താൻ ബിജെപി സർക്കാർ തയ്യാറായില്ലെന്ന് പ്രിയങ്കാ ഗാന്ധി വിമർശിച്ചു. ഇലക്ട്രോണിക് വോട്ടിംഗ് മെഷീനുകളിലൂടെ വോട്ടുകൾ മോഷ്ടിക്കപ്പെടുന്നതിനെക്കുറിച്ച് ചർച്ച ചെയ്യണമെന്ന ആവശ്യം സർക്കാർ അവഗണിച്ചുവെന്നും അവർ ആരോപിച്ചു. പാർലമെന്റിൽ ഗുരുതര വിഷയങ്ങൾക്ക് പകരം അസംബന്ധ ചർച്ചകൾ നടത്താനാണ് കേന്ദ്ര സർക്കാർ താൽപ്പര്യം കാണിക്കുന്നതെന്നും പ്രിയങ്ക പറഞ്ഞു.
ന്യായമായ തെരഞ്ഞെടുപ്പിൽ മത്സരിക്കാൻ ബിജെപിയെ വെല്ലുവിളിക്കുന്നതായി പ്രിയങ്കാ ഗാന്ധി വ്യക്തമാക്കി. ബാലറ്റ് പേപ്പറിൽ തെരഞ്ഞെടുപ്പ് നടത്തിയാൽ ബിജെപി ഒരിക്കലും വിജയിക്കില്ലെന്നും അവർ ആരോപിച്ചു. ബിഹാർ തെരഞ്ഞെടുപ്പ് ഫലത്തെക്കുറിച്ച് നിരാശപ്പെടേണ്ടതില്ലെന്നും, രാജ്യത്തെ ജനങ്ങൾ ബിജെപി വിജയത്തിന്റെ പിന്നിലെ വോട്ട് കൊള്ളയെ തിരിച്ചറിയുന്നുണ്ടെന്നും പ്രിയങ്ക കൂട്ടിച്ചേർത്തു.
എസ്ഐആറിനെതിരെ രാജ്യവ്യാപക പ്രക്ഷോഭങ്ങൾ ശക്തമാക്കുമെന്ന് കോൺഗ്രസ് നേതൃത്വം മഹാറാലിയിലൂടെ വ്യക്തമാക്കി.
