ആലപ്പുഴ: മുതിർന്ന സിപിഎം നേതാവും മുൻ മന്ത്രിയുമായ ജി. സുധാകരൻ സൈബർ ആക്രമണത്തിനെതിരെ പൊലീസിൽ പരാതി നൽകി. തൻ്റെ പേരും ചിത്രവും ഉപയോഗിച്ച് സാമൂഹ്യ മാധ്യമങ്ങളിൽ അശ്ലീലവും ക്രിമിനൽ സ്വഭാവമുള്ളതുമായ പോസ്റ്റുകൾ പ്രചരിപ്പിക്കുന്നുവെന്നാണ് പരാതി.
അമ്പലപ്പുഴ ഡിവൈഎസ്പിക്കാണ് സുധാകരൻ നേരിട്ട് എത്തി പരാതി നൽകിയത്. “സഖാവ് പിണറായി വിജയന് ജി. സുധാകരൻ അയച്ച കവിത വൈറലാകുന്നു” എന്ന തലക്കെട്ടോടെയാണ് കുറിപ്പുകൾ സോഷ്യൽ മീഡിയയിൽ വ്യാപകമായി പ്രചരിക്കുന്നത്. ഇതിന് സമാനമായ രീതിയിൽ ക്രിമിനൽ സ്വഭാവമുള്ള നിരവധി പോസ്റ്ററുകളും പോസ്റ്റുകളും പ്രചരിക്കുന്നുണ്ടെന്നും, ഇതെല്ലാം തന്നെ മനഃപൂർവം അപമാനിക്കാൻ വേണ്ടിയുള്ള ശ്രമമാണെന്നും സുധാകരൻ കഴിഞ്ഞ ദിവസം ഫേസ്ബുക്ക് പോസ്റ്റിലൂടെ വ്യക്തമാക്കിയിരുന്നു.
സൈബർ ആക്രമണത്തിന് പിന്നിലെ വ്യക്തികളെ കണ്ടെത്താനും, കുറ്റക്കാർക്കെതിരെ നിയമനടപടി സ്വീകരിക്കാനും ആവശ്യപ്പെട്ടാണ് ഡിവൈഎസ്പിക്ക് പരാതി നൽകിയത്. സംഭവം രാഷ്ട്രീയ വൃത്തങ്ങളിലും സോഷ്യൽ മീഡിയയിലും ശക്തമായ പ്രതികരണങ്ങൾ സൃഷ്ടിച്ചിട്ടുണ്ട്.
