തിരുവനന്തപുരം: സംസ്ഥാനത്ത് സ്വകാര്യ ബസുകളുടെ മത്സരയോട്ടവും അശ്രദ്ധമായ ഡ്രൈവിംഗും തടയുന്നതിനായി ഗതാഗത വകുപ്പ് ജിയോ ഫെൻസിങ് സംവിധാനം സംസ്ഥാനവ്യാപകമായി നടപ്പാക്കും. ഹൈക്കോടതി നൽകിയ നിർദ്ദേശത്തെ തുടര്ന്നാണ് നടപടി. ബസുകളുടെ പുതുക്കിയ സമയക്രമം ഉടൻ പ്രഖ്യാപിക്കുമെന്ന് ഗതാഗതമന്ത്രി കെ.ബി. ഗണേഷ് കുമാർ അറിയിച്ചു.
ജിപിഎസ്, ആർഎഫ്ഐഡി, വൈ-ഫൈ തുടങ്ങിയ സാങ്കേതിക വിദ്യകൾ ഉപയോഗിച്ച് നിശ്ചിത പ്രദേശത്ത് വെർച്വൽ വേലി സൃഷ്ടിക്കുന്ന സംവിധാനം തന്നെയാണ് ജിയോ ഫെൻസിങ്. ബസുകൾ സമയക്രമം പാലിക്കുന്നുവെന്ന് ഉറപ്പാക്കാൻ സംസ്ഥാനത്തുടനീളം ഈ സംവിധാനം നടപ്പാക്കാൻ ബസ് ഓപ്പറേറ്റർ സംഘടനകൾ സമ്മതിച്ചിട്ടുണ്ട്. നിലവിൽ പാലക്കാട്–തൃശൂർ റൂട്ടിൽ ജിയോ ഫെൻസിങ് വിജയകരമായി നടപ്പിലാക്കിയിട്ടുണ്ട്.
നഗരപ്രദേശങ്ങളിൽ ബസുകൾക്കിടയിലെ ഇടവേള കുറഞ്ഞത് അഞ്ച് മിനിറ്റ്, ഗ്രാമപ്രദേശങ്ങളിൽ 10 മിനിറ്റ് എന്നിങ്ങനെ സർക്കാർ നിർദ്ദേശം നൽകി. ഓരോ പോയിന്റിലും ബസുകൾ കടന്നുപോകുന്ന സമയം ജിയോ ഫെൻസിങ് രേഖപ്പെടുത്തും.
ക്രിമിനൽ പശ്ചാത്തലമുള്ളവരെ ജീവനക്കാരായി നിയമിക്കുന്നത് ഒഴിവാക്കാനും, മയക്കുമരുന്ന് വ്യാപാരത്തിലോ സ്ത്രീകൾക്കെതിരായ അതിക്രമത്തിലോ ഏർപ്പെട്ടിട്ടുള്ള ഡ്രൈവർമാരെ ഒഴിവാക്കാനും മന്ത്രിയുടെ നിർദ്ദേശം. റോഡ് സുരക്ഷാ അതോറിറ്റി ഇതിനായി രണ്ട് കോടി രൂപ നീക്കിവെച്ചിട്ടുണ്ട്.
