തിരുവനന്തപുരം: ജിഎസ്ടി നിരക്കുകൾ കുറച്ചതിന്റെ പ്രയോജനം ഉപഭോക്താക്കൾക്ക് നേരിട്ട് ലഭിക്കുന്നുണ്ടോ എന്ന് ഉറപ്പാക്കാൻ കേന്ദ്ര ധനമന്ത്രാലയം സംസ്ഥാനങ്ങളിലെ കേന്ദ്ര ജിഎസ്ടി ഓഫീസുകൾക്ക് നിർദേശം നൽകി.
54 ഇനങ്ങളാണ് നിരീക്ഷണ പട്ടികയിൽ ഉൾപ്പെടുത്തിയിരിക്കുന്നത്. മരുന്നുകൾ, നിത്യോപയോഗ സാധനങ്ങൾ, ഇലക്ട്രോണിക് ഉത്പന്നങ്ങൾ, ഭക്ഷ്യവസ്തുക്കൾ, ടൂത്ത് ബ്രഷ്, സോപ്പ്, അടുക്കള ഉപകരണങ്ങൾ, സിമന്റ്, കളിപ്പാട്ടങ്ങൾ എന്നിവ ഉൾപ്പെടുന്നു.
സെപ്റ്റംബർ 30-നകം ആദ്യ റിപ്പോർട്ട് സമർപ്പിക്കണം. തുടർന്നുള്ള മാസങ്ങളിൽ 20-ാം തീയതിക്കുമുമ്പും റിപ്പോർട്ട് നൽകേണ്ടതുണ്ട്.
ഉപഭോക്താക്കൾ ചെയ്യേണ്ടത്
സാധനങ്ങൾ വാങ്ങുമ്പോൾ ബിൽ വാങ്ങണം. പുതുക്കിയ ജിഎസ്ടി നിരക്കുകൾ ബില്ലിൽ പ്രതിഫലിച്ചിട്ടുണ്ടോ എന്ന് പരിശോധിക്കണം. പഴയ ബില്ലുകളും കൈവശം സൂക്ഷിക്കുന്നത് താരതമ്യം ചെയ്യാൻ സഹായകരം.
ചില ഉത്പന്നങ്ങൾ പൂർണമായും നികുതിയിളവിലാണ്. ഉദാഹരണത്തിന് കടകളിൽ നിന്ന് വാങ്ങുന്ന പൊറോട്ടയ്ക്ക് നികുതി ഇല്ല, എന്നാൽ ഹോട്ടലുകളിൽ സർവീസ് വിഭാഗത്തിൽ വരുന്ന പൊറോട്ടയ്ക്ക് 5% നികുതി തുടരും.
വ്യാപാരികൾക്കുള്ള നിർദേശം
സെൻട്രൽ ജിഎസ്ടി ആൻഡ് കസ്റ്റംസ് തിരുവനന്തപുരം സോൺ ചീഫ് കമ്മിഷണർ എസ്.കെ. റഹ്മാൻ പറഞ്ഞു:
പുതിയ നിരക്കുകൾ ബില്ലിങ് സിസ്റ്റത്തിൽ അപ്ലോഡ് ചെയ്യണം. വില വ്യത്യാസം വ്യക്തമായി ഉപഭോക്താക്കളെ അറിയിക്കണം. സ്റ്റോക്ക് നഷ്ടം വരാതെ വ്യാപാരികൾക്ക് വില ക്രമീകരിക്കാം. ജീവനക്കാർക്ക് പരിശീലനം നൽകണമെന്നും നിർദേശിച്ചിട്ടുണ്ട്.
വിനോദസഞ്ചാര രംഗത്തും നേട്ടം
7500 രൂപയിൽ താഴെ വാടകയുള്ള ഹോട്ടൽ മുറികൾക്ക് നികുതി 18% ൽ നിന്ന് 5% ആയി കുറയും. ടൂർ പാക്കേജുകളുടെ ജിഎസ്ടി 28% ൽ നിന്ന് 18% ആയി കുറയുന്നത് കേരളത്തിലെ ടൂറിസം മേഖലയ്ക്ക് ഗുണകരമാകും.
പരാതികൾ അറിയിക്കാം
ജിഎസ്ടി ഇളവ് വിലയിൽ പ്രതിഫലിക്കുന്നില്ലെങ്കിൽ ഉപഭോക്താക്കൾക്ക് പരാതിപ്പെടാം:
📧 Email: dckerala@gmail.com
📞 Toll-Free: 8004253182
