സംസ്ഥാനത്ത് വീണ്ടും ശക്തമായ മഴ; വയനാട്, കണ്ണൂർ, കാസർകോട് ജില്ലകളിൽ ഓറഞ്ച് അലർട്ട് – തൃശ്ശൂർ, മലപ്പുറം, കോഴിക്കോട് ജില്ലകളിൽ യെല്ലോ അലർട്ട്. അടുത്ത അഞ്ച് ദിവസം ശക്തമായ മഴയ്ക്ക് സാധ്യത.
തിരുവനന്തപുരം: സംസ്ഥാനത്ത് വീണ്ടും ശക്തമായ മഴയ്ക്കുള്ള സാധ്യത. അടുത്ത അഞ്ച് ദിവസം വ്യാപകമായ മഴ ഉണ്ടാകുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. ഒറ്റപ്പെട്ടയിടങ്ങളിൽ ശക്തമായ മഴയ്ക്കുള്ള സാധ്യതയും പ്രവചിച്ചിട്ടുണ്ട്.
വ്യാഴാഴ്ച കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ യെല്ലോ അലർട്ട് തുടരുമെന്നും മുന്നറിയിപ്പുണ്ട്.
വടക്കുപടിഞ്ഞാറൻ ബംഗാൾ ഉൾക്കടലിൽ ഒഡിഷ തീരത്തിന് സമീപം ശക്തിപ്രാപിച്ച ന്യൂനമർദ്ദമാണ് മഴയ്ക്ക് കാരണമായി കാണുന്നത്. അടുത്ത അഞ്ച് ദിവസം കേരളത്തിൽ മഴയ്ക്കു സാധ്യതയുണ്ടെന്നും പ്രത്യേകിച്ച് ബുധൻ, വ്യാഴം ദിവസങ്ങളിൽ അതിശക്തമായ മഴയ്ക്ക് സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചു.
ദുരന്തനിവാരണ അതോറിറ്റി ജനങ്ങളെ ജാഗ്രത പാലിക്കണമെന്ന് നിർദേശിച്ചു. മലഞ്ചരിവുകളിലും നദീതീരങ്ങളിലും താമസിക്കുന്നവർ പ്രത്യേകം ശ്രദ്ധിക്കണമെന്നും അധികൃതർ മുന്നറിയിപ്പ് നൽകി.
