കോഴിക്കോട്: വരാനിരിക്കുന്ന നിയമസഭാ തിരഞ്ഞെടുപ്പില് കേരളം ഉറ്റുനോക്കുന്ന പ്രധാന പോരാട്ടഭൂമികളിലൊന്നായി കോഴിക്കോട് ജില്ല മാറുകയാണ്. ആകെയുള്ള 13 നിയമസഭാ സീറ്റുകളില് കാലങ്ങളായി ഇടതു മുന്നണിയാണ് മേല്ക്കൈ പുലര്ത്തുന്നത്. എന്നാല് ഈ പതിവ് മാറ്റാനാകുമെന്ന ആത്മവിശ്വാസത്തിലാണ് ഇത്തവണ യുഡിഎഫ്.
കഴിഞ്ഞ രണ്ട് പതിറ്റാണ്ടായി നിയമസഭയില് കോണ്ഗ്രസ് പ്രതിനിധിയില്ലാത്തതിന്റെ ‘നാണക്കേട്’ മായ്ക്കാനാകുമെന്ന പ്രതീക്ഷയിലാണ് യുഡിഎഫ് നേതൃത്വം. തദ്ദേശ സ്വയംഭരണ തിരഞ്ഞെടുപ്പില് നേടിയ അപ്രതീക്ഷിത മുന്നേറ്റമാണ് ഈ ആത്മവിശ്വാസത്തിന് പിന്നില്. സുല്ത്താന് ബത്തേരിയില് നടന്ന യുഡിഎഫ് നേതൃസംഗമത്തില് കോഴിക്കോട് ജില്ല കോണ്ഗ്രസിന് ശക്തമായി തിരിച്ചുവരാന് സാധ്യതയുള്ള പ്രദേശമാണെന്ന് വിലയിരുത്തിയിരുന്നു.
തദ്ദേശ തിരഞ്ഞെടുപ്പ് നല്കിയ ആത്മവിശ്വാസം
തദ്ദേശ തിരഞ്ഞെടുപ്പില് കോഴിക്കോട് കോര്പ്പറേഷന് ഭരണം വെറും 64 വോട്ടുകള്ക്കാണ് യുഡിഎഫിന് നഷ്ടമായത്. പല ഡിവിഷനുകളും വളരെ ചെറിയ വോട്ടിനാണ് കൈവിട്ടത്. അതേസമയം, ചരിത്രത്തിലാദ്യമായി ജില്ലാ പഞ്ചായത്ത് ഭരണം പിടിച്ചെടുക്കാനും, ഭൂരിഭാഗം ബ്ലോക്ക്–ഗ്രാമ പഞ്ചായത്തുകളിലും മേല്ക്കൈ നേടാനും കഴിഞ്ഞത് ഭരണവിരുദ്ധ വികാരം ശക്തമാണെന്നതിന്റെ സൂചനയാണെന്ന് രാഷ്ട്രീയ നിരീക്ഷകര് ചൂണ്ടിക്കാട്ടുന്നു.
ബേപ്പൂരില് നിര്ണായക നീക്കം
ഏറ്റവും കൂടുതല് ചര്ച്ച നടക്കുന്നത് ബേപ്പൂര് മണ്ഡലത്തിലാണ്. മന്ത്രി മുഹമ്മദ് റിയാസിനെതിരെ പി.വി. അന്വറിനെ യുഡിഎഫ് പിന്തുണയോടെ സ്വതന്ത്ര സ്ഥാനാര്ഥിയായി രംഗത്തിറക്കാനുള്ള സാധ്യതകള് ശക്തമാണ്. ‘മരുമോനിസത്തിന്റെ വേരറുക്കാന് ബേപ്പൂരില് മത്സരിക്കും’ എന്ന അന്വറിന്റെ പ്രഖ്യാപനവും, യുഡിഎഫ് അസോസിയേറ്റ് അംഗത്വവും ഈ നീക്കത്തിന് രാഷ്ട്രീയ പ്രാധാന്യം നല്കുന്നു. മലപ്പുറത്ത് മത്സരസാധ്യത ഇല്ലാത്തതിനാല് ബേപ്പൂര് തന്നെയാണ് അന്വറിന്റെ പ്രധാന ലക്ഷ്യം.
13ല് 9 സീറ്റുകള് ഉറപ്പെന്ന് കോണ്ഗ്രസ്
കോഴിക്കോട് ജില്ലയിലെ 13 മണ്ഡലങ്ങളില് ഒന്പതിലും വിജയം ഉറപ്പാണെന്നാണ് കോണ്ഗ്രസ് വിലയിരുത്തല്. പ്രധാന സ്ഥാനാര്ഥികളായി പരിഗണിക്കപ്പെടുന്നവര്:
കോഴിക്കോട് നോര്ത്ത്: കെ. ജയന്ത് (കെപിസിസി ജനറല് സെക്രട്ടറി)
ബേപ്പൂര്: പി.വി. അന്വര് (സ്വതന്ത്രന് – യുഡിഎഫ് പിന്തുണ)
കൊയിലാണ്ടി: കെ. പ്രവീണ്കുമാര് (ഡിസിസി പ്രസിഡന്റ്)
നാദാപുരം: കെ.എം. അഭിജിത്ത് (യൂത്ത് കോണ്ഗ്രസ്)
ബാലുശ്ശേരി: സൂരജ് (കെഎസ്യു ജില്ലാ പ്രസിഡന്റ്)
എലത്തൂര്: വിദ്യ ബാലകൃഷ്ണന് (കോണ്ഗ്രസ് തീരുമാനമുണ്ടെങ്കില്)
കൊടുവള്ളി (എം.കെ. മുനീര്),
വടകര (കെ.കെ. രമ) എന്നീ മണ്ഡലങ്ങളിലാണ് യുഡിഎഫിന് എംഎല്എമാര് ഉള്ളത്. ഇവിടങ്ങളില് ഇക്കുറിയും ഇതേ സ്ഥാനാര്ഥികളായിരിക്കും മത്സരിക്കുക. കോഴിക്കോട് സൗത്ത് മണ്ഡലത്തില് മുസ്ലിം ലീഗ് സ്ഥാനാര്ഥി ഇതുവരെ തീരുമാനമായിട്ടില്ല. കുറ്റ്യാടിയില് പാറക്കല് അബ്ദുള്ള മത്സരിക്കുമെന്നാണ് സൂചന. കുന്ദമംഗത്ത് യൂത്ത് ലീഗ് നേതാവ് പി.കെ. ഫിറോസും രംഗത്തുണ്ടാകും.
ഏകോപനത്തില് എം.കെ. രാഘവന് മുന്നില്
എം.കെ. രാഘവന്, ഷാഫി പറമ്പില് എംപിമാരുടെ നേതൃത്വത്തില് നടക്കുന്ന ഏകോപിത പ്രവര്ത്തനങ്ങളാണ് ജില്ലയില് യുഡിഎഫിന് ശക്തമായ അടിത്തറ ഒരുക്കുന്നത്. ബിജെപി വോട്ടുകള് ഇടത് കോട്ടകളില് വിള്ളല് സൃഷ്ടിക്കുമെന്നും അത് യുഡിഎഫിന് ഗുണകരമാകുമെന്നുമാണ് കണക്കുകൂട്ടല്.
സിപിഎമ്മില് അകത്തള പ്രതിസന്ധി
ബേപ്പൂരില് മുഹമ്മദ് റിയാസ് മന്ത്രി ആയതോടെ സിപിഎമ്മിനുള്ളില് തന്നെ അസ്വസ്ഥതകള് രൂപപ്പെട്ടുവെന്നാണ് വിലയിരുത്തല്. മുന് നേതാക്കളെ sidelined ചെയ്തതോടെ ഇടത് ക്യാമ്പില് പ്രതിസന്ധി രൂക്ഷമായിരിക്കുകയാണ്. ഈ ഘട്ടത്തിലാണ് കോണ്ഗ്രസ് ‘സീറോ’യില് നിന്നുള്ള ഉയര്ത്തെഴുന്നേല്പ് ലക്ഷ്യമിടുന്നത്.
