തിരുവനന്തപുരം: പോലീസ് മർദനത്തിൽ പ്രതിഷേധിച്ച് കെഎസ്യു പ്രവർത്തകർ നിയമസഭയിലേക്ക് നടത്തിയ മാർച്ചിൽ സംഘർഷം ഉണ്ടായി. പൊലീസിന് നേരെ പ്രവർത്തകർ കമ്പും കല്ലും എറിഞ്ഞു.
പ്രവർത്തകരെ പിരിച്ചുവിടാൻ പൊലീസ് 17 തവണയിൽ കൂടുതൽ ജലപീരങ്കി പ്രയോഗിച്ചു. വലിയ പ്രതിഷേധം പ്രതീക്ഷിച്ച പൊലീസ് രണ്ട് വാഹനങ്ങളിൽ നിന്നാണ് ജലപീരങ്കി പ്രയോഗം നടത്തിയത്. എങ്കിലും പ്രവർത്തകർ പിന്മാറാതെ വീണ്ടും മുദ്രാവാക്യം വിളികളോടെ മുന്നോട്ട് നീങ്ങി.
പ്രതിഷേധ മാർച്ചിന് കെഎസ്യു സംസ്ഥാന പ്രസിഡന്റ് അലോഷ്യസ് സേവ്യർ നേതൃത്വം നൽകി. വനിതാ പ്രവർത്തകരും മുൻനിരയിൽ ഉണ്ടായിരുന്നു. ബാരിക്കേഡ് മറികടക്കാനും പ്രവർത്തകർ ശ്രമിച്ചു.
മുഖ്യമന്ത്രി ആഭ്യന്തരവകുപ്പ് ഒഴിയണമെന്ന് ആവശ്യപ്പെട്ടായിരുന്നു പ്രതിഷേധം.
