ആരാധകര്ക്ക് നിരാശ; മെസ്സിപ്പട കേരളത്തിലേക്കില്ല
അർജന്റീന ടീം നവംബറിൽ വരില്ലെന്ന് സ്ഥിരീകരിച്ച് സ്പോൺസർ
ചെന്നൈ: ലോകഫുട്ബോളിന്റെ സൂപ്പര്താരമായ ലയണല് മെസിയും അർജന്റീന ഫുട്ബോൾ ടീമും നവംബറിൽ കേരളത്തിലേക്ക് എത്തില്ലെന്ന് ഔദ്യോഗികമായി സ്ഥിരീകരിച്ചു. സ്പോൺസര് തന്നെയാണ് വിവരം സ്ഥിരീകരിച്ചത്.
അംഗോളയിലേക്കുള്ള പര്യടനമാണ് നിലവിൽ അർജന്റീന ഫുട്ബോൾ അസോസിയേഷൻ (AFA) തീരുമാനിച്ചിരിക്കുന്നത്. നവംബറിൽ കൊച്ചിയിൽ മത്സരം നടക്കുമെന്ന് നേരത്തെ സർക്കാരും സ്പോൺസറും അറിയിച്ചിരുന്നുവെങ്കിലും, ആ തീരുമാനം ഇനി നിലവിലില്ല.
കേരളം മത്സരത്തിന് ആവശ്യമായ ക്രമീകരണങ്ങൾ നിശ്ചിത സമയത്ത് പൂർത്തിയാക്കിയില്ലെന്നാണ് അർജന്റീനയിലെ മാധ്യമങ്ങൾ എഎഫ്എ ഭാരവാഹികളെ ഉദ്ധരിച്ച് റിപ്പോർട്ട് ചെയ്യുന്നത്. ഇതോടെ ആരാധകർ ഏറെ പ്രതീക്ഷയോടെ കാത്തിരുന്ന ‘മെസ്സി കൊച്ചി ഷോ’ താത്കാലികമായി റദ്ദായി.
അതേസമയം, മാർച്ചിൽ അർജന്റീന ടീം ഇന്ത്യയിലെത്തും എന്ന് സ്പോൺസർ വ്യക്തമാക്കി. എന്നാൽ, തീയതി സംബന്ധിച്ച് ഇതുവരെ വ്യക്തതയില്ല.
അർജന്റീന ടീമിന്റെയും മെസിയുടെയും കേരള സന്ദർശനം സംബന്ധിച്ച് അവസാന ദിവസങ്ങളിൽ രാഷ്ട്രീയ വിവാദം പടർന്നു. അർജന്റീന ഫുട്ബോൾ അസോസിയേഷൻ സംസ്ഥാന സർക്കാരിന്റെ അശ്രദ്ധ ചൂണ്ടിക്കാട്ടിയതോടെ പ്രതിപക്ഷം വിഷയം രാഷ്ട്രീയ ആയുധമാക്കി മാറ്റിയിരുന്നു.
2011 സെപ്റ്റംബറിലാണ് ലയണല് മെസി ഇതിന് മുമ്പ് ഇന്ത്യയിലെത്തിയത്. അന്ന് കൊൽക്കത്തയിലെ സാൾട്ട്ലേക്ക് സ്റ്റേഡിയത്തിൽ വെനസ്വേലയെതിരെ അർജന്റീന കുപ്പായത്തിൽ സൗഹൃദ മത്സരത്തിലും അദ്ദേഹം പങ്കെടുത്തിരുന്നു. അത് തന്നെയാണ് അർജന്റീന ടീമിന്റെ നായകനായ മെസിയുടെ ആദ്യ മത്സരം കൂടിയായിരുന്നു.
