തൃശൂര് ∣ October 27, 2025:
ഫുട്ബോള് താരം ലയണല് മെസി കേരളത്തിലെത്തുമെന്ന പ്രചാരണമെക്കുറിച്ചുള്ള ചോദ്യങ്ങളില്നിന്ന് കായികമന്ത്രി വി. അബ്ദുറഹിമാന് ഒഴിഞ്ഞുമാറിയതോടെ കലൂര് സ്റ്റേഡിയം നവീകരണ വിവാദം കൂടുതല് ചൂടുപിടിക്കുന്നു.
തൃശൂര് എരുമപ്പെട്ടിയില് നടന്ന ഗ്രൗണ്ട് ഉദ്ഘാടനം ചടങ്ങിലായിരുന്നു സംഭവം. മാധ്യമങ്ങള് കലൂര് സ്റ്റേഡിയം നവീകരണവുമായി ബന്ധപ്പെട്ട ചോദ്യങ്ങള് ഉന്നയിച്ചപ്പോള് മന്ത്രി മുഖം തിരിച്ച് മറുപടി നല്കാതെ മൗനം പാലിച്ചു.
മാധ്യമങ്ങളുടെ തുടര്ച്ചയായ ചോദ്യങ്ങള്ക്ക് അസഹിഷ്ണുത പ്രകടിപ്പിച്ച തൃശൂര് എംഎല്എ എ.സി. മൊയ്തീന് “ഇപ്പോള് ചോദിക്കാന് പറ്റില്ല” എന്ന് പറഞ്ഞ് ക്യാമറ തടയുകയും മൈക്ക് തള്ളുകയും ചെയ്തു. തുടര്ന്ന് മന്ത്രിയെ പിന്തുടര്ന്ന ട്വന്റിഫോര് റിപ്പോര്ട്ടര് സൂരജ് ശശിയെ പൊലീസ് തടഞ്ഞു പിടിച്ചുമാറ്റുകയും ചെയ്തു.
കലൂര് സ്റ്റേഡിയം നവീകരണ കരാറില് ദുരൂഹതയുണ്ടെന്നാരോപിച്ച് കോണ്ഗ്രസും ബിജെപിയും രംഗത്ത് എത്തിയിട്ടുണ്ട്. സ്പോണ്സര് കമ്പനിയുമായുള്ള ജിസിഡിഎ കരാറിന്റെ പകര്പ്പ് പുറത്തുവിടണമെന്ന് ഹൈബി ഈഡന് എം.പി. ആവശ്യപ്പെട്ടു. “മെസി കേരളത്തിലേക്കെത്തുമെന്ന പ്രചാരണം സംബന്ധിച്ച വ്യക്തതയില്ലായ്മ കായികരംഗത്തും പൊതുജനങ്ങളിലും ആശങ്ക സൃഷ്ടിച്ചിരിക്കുകയാണ്. കാര്യങ്ങള് ജിസിഡിഎയും കായിക വകുപ്പും വ്യക്തമാക്കേണ്ടതുണ്ട്,” ഹൈബി ഈഡന് പറഞ്ഞു.
ഇതേസമയം, മെസി സന്ദര്ശനവുമായി ബന്ധപ്പെട്ട ഔദ്യോഗിക സ്ഥിരീകരണം ഇതുവരെ വന്നിട്ടില്ല. കലൂര് സ്റ്റേഡിയം നവീകരണത്തിന്റെ ഭാവിയും പദ്ധതിയുടെ സാമ്പത്തിക വ്യക്തതയും സംബന്ധിച്ച് പ്രതിപക്ഷം ഉയര്ത്തിയ ചോദ്യങ്ങള്ക്ക് മന്ത്രിയുടെ മൗനം കൂടുതല് സംശയങ്ങള്ക്ക് വഴിതെളിയിക്കുന്നു.
