മലയാള സിനിമാ സൂപ്പർസ്റ്റാറും (ഹോണററി) ലെഫ്റ്റനന്റ് കേണലുമായ മോഹൻലാലിനെ ഇന്ത്യൻ ആർമി ചീഫ് ജനറൽ ഉപേന്ദ്ര ദ്വിവേദി ആദരിച്ചു. സമൂഹത്തിന് നൽകിയ മികച്ച സംഭാവനകൾക്കും സൈന്യവുമായുള്ള തുടർച്ചയായ ബന്ധത്തിനുമുള്ള അംഗീകാരമായാണ് ചീഫ് ഓഫ് ആർമി സ്റ്റാഫ് കമൻഡേഷൻ കാർഡ് സമ്മാനിച്ചത്.
മോഹൻലാലിന് ഈ ബഹുമതി ലഭിച്ചത് ദാദാസാഹിബ് ഫാൽക്കേ പുരസ്കാരം നേടിയതിന്റെ പിന്നാലെയാണെന്നത് ശ്രദ്ധേയമാണ്. കരസേനാ ആസ്ഥാനത്ത് നടന്ന ചടങ്ങിൽ മോഹൻലാൽ സൈനികരുമായും സംസാരിച്ചു. “സേവനവും അച്ചടക്കവും ദേശസ്നേഹവുമാണ് സൈന്യത്തിന്റെ മൂല്യങ്ങൾ, അതാണ് എനിക്ക് പ്രചോദനമായത്,” എന്ന് മോഹൻലാൽ പ്രതികരിച്ചു.
2009-ൽ ടെറിറ്റോറിയൽ ആർമിയിലെ 122 ഇൻഫൻട്രി ബറ്റാലിയൻ മദ്രാസ് യൂണിറ്റിൽ (TA Madras) ഹോണററി ലെഫ്റ്റനന്റ് കേണൽ പദവിയിൽ ചേർന്ന മോഹൻലാൽ, അന്ന് മുതൽ സൈന്യവുമായി സഹകരിച്ച് വിവിധ സാമൂഹിക സേവന പ്രവർത്തനങ്ങളിൽ സജീവമാണ്.
സിനിമയ്ക്കപ്പുറം അദ്ദേഹത്തിന്റെ വിശ്വശാന്തി ഫൗണ്ടേഷൻ വിദ്യാഭ്യാസം, ആരോഗ്യം, പരിസ്ഥിതി സംരക്ഷണം, ക്ഷേമം തുടങ്ങിയ മേഖലകളിൽ പ്രവർത്തിക്കുന്നു. വയനാട് പ്രകൃതി ദുരന്തകാലത്ത് ദുരിതാശ്വാസ പ്രവർത്തനങ്ങളിൽ പങ്കെടുത്തത് അദ്ദേഹത്തിന്റെ മനുഷ്യസ്നേഹത്തിന് ഉദാഹരണമാണ്.
