തിരുവനന്തപുരം: വിരമിക്കുന്ന മോട്ടോര്വാഹനവകുപ്പ് ഉദ്യോഗസ്ഥര്ക്ക് സ്വര്ണമോതിരം നല്കാന് ഡ്രൈവിങ് സ്കൂളുകളില് നിന്ന് പണപ്പിരിവ് നടത്തിയതടക്കമുള്ള വന്ക്രമക്കേടുകളാണ് വിജിലന്സ് പരിശോധനയില് കണ്ടെത്തിയത്. എറണാകുളം ജില്ലയിലെ ഒരു സബ് ആര്.ടി.ഓ ഓഫീസില് വിരമിക്കല് ചടങ്ങിനായി നാലു സ്വര്ണമോതിരം വാങ്ങാനാണ് ഡ്രൈവിങ് സ്കൂള് നടത്തിപ്പുകാരില് നിന്ന് പണം ഈടാക്കിയതെന്ന് റിപ്പോര്ട്ടില് വ്യക്തമാക്കുന്നു.
ജൂലൈ 19-ന് നടന്ന ‘ഓപ്പറേഷന് വീല്സ്’ പരിശോധനയിലാണ് അന്വേഷണ വിവരങ്ങള് പുറത്ത് വന്നത്. കുറ്റക്കാരായ 112 ഉദ്യോഗസ്ഥര്ക്കെതിരായ അന്വേഷണം പുരോഗമിക്കുകയാണ്.
ഭൂരിഭാഗം ഓഫീസുകളിലും ഡ്രൈവിങ് സ്കൂളുകളില് നിയമാനുസൃത പരിശോധന നടന്നിരുന്നില്ല. മലപ്പുറം, കണ്ണൂര് ജില്ലകളില് ലൈസന്സില്ലാതെ സ്കൂളുകള് പ്രവര്ത്തിച്ചു. പരിശീലനത്തിനും ടെസ്റ്റിനും ഉപയോഗിച്ച വാഹനങ്ങള്ക്ക് ഫിറ്റ്നസ്, ഇന്ഷുറന്സ്, പൊലൂഷന് സര്ട്ടിഫിക്കറ്റ് എന്നിവയില്ലായിരുന്നു. നിര്ബന്ധമായ ഡ്രൈവിങ് ടെസ്റ്റ് വീഡിയോ രേഖപ്പെടുത്തല് നടന്നിരുന്നില്ല.
മലപ്പുറം ജില്ലയിലെ ഒരു സബ് ഓഫീസില് അപേക്ഷകര് നേരിട്ട് നല്കിയ 384 അപേക്ഷകള് നിരസിച്ചതും, ഹാജര്-കാഷ് രജിസ്റ്ററുകള് അപൂര്ണമാണെന്നും കണ്ടെത്തി. ഇടനിലക്കാര്ക്ക് ഓഫീസുകളില് പ്രവേശനം നിരോധിച്ചിട്ടുണ്ടെങ്കിലും നിരന്തരമായി ഇടപെടലുകള് നടന്നിരുന്നു.
വയനാട്ടില് അപേക്ഷയോടൊപ്പം ഏജന്റിന്റെ ശുപാര്ശക്കത്തും കണ്ടെത്തി. ബന്ധുക്കളുടെ അക്കൗണ്ടിലേക്കും ജിപേ വഴി കൈക്കൂലി സ്വീകരിച്ചതായും വിജിലന്സ് കണ്ടെത്തി.
ഇടനിലക്കാരുമായുള്ള ഇടപാടുകള് സംബന്ധിച്ച് ‘മാതൃഭൂമി’ പുറത്ത് വിട്ട വാര്ത്തകള്ക്ക് പരിശോധനയില് ശരിവെപ്പ് ലഭിച്ചു. അപേക്ഷകര് നേരിട്ട് ഹാജരാകേണ്ടാത്ത ഫേസ്ലെസ് അപേക്ഷകള് പോലും തീരുമാനമെടുക്കാതെ മാറ്റിവെക്കുന്ന പ്രവണതയും പുറത്തുവന്നു.
👉 മോട്ടോര്വാഹന വകുപ്പിനുള്ളിലെ അഴിമതി സംഘടിത രൂപത്തില് നടന്നിരുന്നുവെന്നതിന് വ്യക്തമായ തെളിവുകളാണ് വിജിലന്സ് റിപ്പോര്ട്ടില് ചൂണ്ടിക്കാട്ടുന്നത്.
