ആലപ്പുഴ: പുന്നമടക്കായലിൽ ആവേശം പൊട്ടിത്തെറിച്ചപ്പോൾ 71-ാമത് നെഹ്റു ട്രോഫി വള്ളംകളിയിൽ ജലരാജാക്കന്മാരായി വീയപുരം ചുണ്ടൻ. ഇഞ്ചോടിഞ്ച് പോരാട്ടമായ ഫൈനലിൽ വൻ കുതിപ്പ് നടത്തിയാണ് അവർ കിരീടം കരസ്ഥമാക്കിയത്.
തുടക്കം മുതലേ മുന്നിൽ നിന്ന വീയപുരം, നടുഭാഗം, മേൽപ്പാടം, നിരണം എന്നീ ശക്തരായ എതിരാളികളെ പിന്നിലാക്കി. അവസാന ഘട്ടം വരെ കടുത്ത മത്സരമായിരുന്നുവെങ്കിലും അവസാന വെട്ടത്തിൽ വീയപുരം മുന്നിലേക്ക് കയറി വിജയമുറപ്പിച്ചു.
ഒന്നാം ട്രാക്കിൽ മേൽപ്പാടം, രണ്ടാമത് നിരണം, മൂന്നാമത് നടുഭാഗം, നാലാമത് വീയപുരം എന്ന ക്രമത്തിലായിരുന്നു ഫൈനൽ പോരാട്ടം. 21 ചുണ്ടൻ വള്ളങ്ങളാണ് ഇത്തവണ മത്സരത്തിനിറങ്ങിയത്. ആറ് ഹീറ്റുകളിൽ നിന്നു നാല് ടീമുകളാണ് കലാശപ്പോരിനായി യോഗ്യത നേടിയിരുന്നത്.
പുന്നമടക്കായലിന്റെ തിരമാലകളിൽ പൊങ്ങിയിരുന്നതു ആവേശവും ആഘോഷവുമായിരുന്നു. വിജയവുമായി വീയപുരം ജലരാജാക്കന്മാർ നാട്ടുകാർക്കും ആരാധകർക്കും ഇരട്ടിമധുരം സമ്മാനിച്ചു.
