ഭുവനേശ്വർ: ഇന്ത്യൻ ധാതുസമ്പത്തിന് പുതിയ മാറ്റുകൂട്ടായി Geological Survey of India (GSI) നടത്തിയ പര്യവേക്ഷണത്തിൽ ഒഡിഷയിലെ വിവിധ ജില്ലകളിൽ ഏകദേശം 20 ടൺ (20,000 കിലോ) സ്വർണശേഖരം കണ്ടെത്തി.
ഡിയോഗഡ്, കിയോഞ്ഞർ, സുന്ദർഗഡ്, നബരങ്പുർ, അങ്കുൽ, കോരപുത് ജില്ലകളിൽ നിന്നാണ് സ്വർണശേഖരം റിപ്പോർട്ട് ചെയ്തത്. ഇതിന്റെ വിപണി മൂല്യം 20,000 കോടിയിലധികം രൂപ വരുമെന്നാണ് കണക്ക്.
ഖനന മന്ത്രാലയത്തിന്റെ കണക്കുകൾ പ്രകാരം 2023–24 സാമ്പത്തിക വർഷത്തിൽ 63,588 കോടി രൂപ മൂല്യമുള്ള ധാതു ഉത്പാദനവുമായി ഒഡിഷ ഇന്ത്യയിലെ മുന്നേറ്റ സംസ്ഥാനമായി. രാജ്യത്തെ മൊത്തം ധാതു ഉത്പാദനത്തിന്റെ 44.9% ഒറ്റയ്ക്ക് ഒഡിഷയിലാണ്.
ഇതിനോടൊപ്പം, മയൂർബഞ്ച്, മാൽഖൻഗിരി, സമ്ബൽപൂർ, ബോദ്ധ് ജില്ലകളിലും സ്വർണശേഖരസാധ്യതകൾക്കായി പര്യവേക്ഷണം തുടരുകയാണ്.
നിലവിൽ ഇന്ത്യയിൽ പ്രതിവർഷം 1.6 ടൺ മാത്രമാണ് ആഭ്യന്തര സ്വർണ ഉത്പാദനം, എന്നാൽ ഉപഭോഗത്തിനായി 700 ടൺ വരെ ഇറക്കുമതി ചെയ്യേണ്ടി വരുന്നു. അതിനാൽ പുതിയ കണ്ടെത്തൽ ആഭ്യന്തര ഉത്പാദനത്തിന് വലിയ പ്രാധാന്യം പുലർത്തുമെന്ന് വിദഗ്ധർ വിലയിരുത്തുന്നു.
ഒഡിഷ മൈനിംഗ് കോർപ്പറേഷൻ, ജിഎസ്ഐ, സംസ്ഥാന സർക്കാർ എന്നിവ ചേർന്ന് ഖനനത്തിനുള്ള വാണിജ്യവൽക്കരണ നടപടികൾ വേഗത്തിലാക്കുന്നുണ്ട്. ഡിയോഗഡിലെ സ്വർണഖനന ബ്ലോക്ക് ലേലത്തിന് തയ്യാറെടുക്കുന്ന നടപടികളും പുരോഗമിക്കുകയാണ്.
എന്നാൽ ഖനന പ്രവർത്തനങ്ങളിൽ നിന്ന് പ്രാദേശിക ജനങ്ങൾക്കുള്ള സാമൂഹിക–പരിസ്ഥിതി ബാധകളും കുടിയിറക്കൽ പ്രശ്നങ്ങളും ഇപ്പോഴും ചോദ്യചിഹ്നമായി തുടരുന്നു.
