പാലക്കാട്: സിപിഎമ്മിൽ വലിയ രാഷ്ട്രീയ ചലനം. പാലക്കാട് വല്ലപ്പുഴ ലോക്കൽ കമ്മിറ്റിയിൽ കൂട്ടരാജിയാണ് വെള്ളിയാഴ്ച ഉണ്ടായത്. ലോക്കൽ കമ്മിറ്റി സെക്രട്ടറി പി. സന്തോഷ്, അംഗങ്ങളായ സുധീപ്, സി.കെ. ബാബു, റഫീഖ് പറക്കാടൻ, മോഹനൻ എന്നിവർ ചേർന്ന് യോഗത്തിനിടെ രാജി പ്രഖ്യാപിച്ചു.
സംഭവം നടന്നത് ചെർപ്പുളശ്ശേരി ഏരിയാ കമ്മിറ്റി ഓഫീസിൽ ചേർന്ന ലോക്കൽ കമ്മിറ്റി യോഗത്തിലാണ്. ചേരിക്കല്ല് ബ്രാഞ്ച് സെക്രട്ടറി കൂടിയായിരുന്ന ലോക്കൽ കമ്മിറ്റി അംഗം സുധീപിനെ വിഭാഗീയത ആരോപിച്ച് ബ്രാഞ്ച് സെക്രട്ടറി സ്ഥാനത്ത് നിന്നും നീക്കം ചെയ്യാൻ ജില്ലാ കമ്മിറ്റി തീരുമാനിച്ചതിന്റെ റിപ്പോർട്ട് അവതരിപ്പിക്കുന്നതിനിടെയായിരുന്നു സംഭവം.
സുധീപിനെതിരെയുള്ള നടപടിയിൽ പ്രതിഷേധിച്ചാണ് കൂട്ടരാജി പ്രഖ്യാപിച്ചത്. രാജിവെച്ചവരിൽ റഫീഖ് പറക്കാടനും സി.കെ. ബാബുവും വല്ലപ്പുഴ പഞ്ചായത്ത് അംഗങ്ങളുമാണ്.
