കണ്ണൂർ: പയ്യന്നൂർ ഫണ്ട് തട്ടിപ്പ് വിവാദത്തിൽ വീണ്ടും ഗുരുതര ആരോപണങ്ങളുമായി വി. കുഞ്ഞികൃഷ്ണൻ രംഗത്ത്. ധനരാജ് രക്തസാക്ഷി ഫണ്ടുമായി ബന്ധപ്പെട്ട നിക്ഷേപത്തിൽ നിന്നുള്ള പലിശ വ്യക്തിപരമായ അക്കൗണ്ടുകളിലേക്ക് മാറ്റിയെന്നാണ് അദ്ദേഹത്തിന്റെ ആരോപണം.
ധനരാജ് ഫണ്ടിൽ നിന്ന് 40 ലക്ഷം രൂപ സ്ഥിര നിക്ഷേപമായി മാറ്റിയതായി കുഞ്ഞികൃഷ്ണൻ വ്യക്തമാക്കി. രണ്ട് ബാങ്ക് ബ്രാഞ്ചുകളിലായി 20 ലക്ഷം രൂപ വീതമാണ് നിക്ഷേപിച്ചതെന്നും, എന്നാൽ ഈ നിക്ഷേപത്തിൽ നിന്ന് ലഭിക്കേണ്ട പലിശ ഫണ്ടിന്റെ അക്കൗണ്ടിലേക്കോ പാർട്ടി അക്കൗണ്ടിലേക്കോ എത്താതെ വ്യക്തിപരമായ അക്കൗണ്ടിലേക്കാണ് പോയതെന്നും അദ്ദേഹം ആരോപിച്ചു.
കൂടാതെ, 34.25 ലക്ഷം രൂപ ചെലവായി കണക്കാക്കിയ വീടിന്റെ നിർമ്മാണത്തിനായി കരാറുകാരന് നൽകിയിരിക്കുന്നത് 29.25 ലക്ഷം രൂപ മാത്രമാണെന്നും, ബാക്കി 5 ലക്ഷം രൂപ സ്വകാര്യ അക്കൗണ്ടിലേക്കാണ് മാറ്റിയതെന്നും കുഞ്ഞികൃഷ്ണൻ ആരോപിക്കുന്നു.
സംഭവവുമായി ബന്ധപ്പെട്ട് കൂടുതൽ അന്വേഷണം ആവശ്യപ്പെട്ട് രാഷ്ട്രീയ തലത്തിൽ വിവാദം ശക്തമാകുകയാണ്.
