തിരുവനന്തപുരം: സംസ്ഥാനത്ത് അതിദരിദ്രർ ഇല്ലാതാകാൻ കാരണമായത് എൽഡിഎഫിന്റെ തുടർഭരണമാണ് എന്ന് മുഖ്യമന്ത്രി പിണറായി വിജയൻ.
യുഡിഎഫ് സർക്കാരുകൾ നാടിനെ അധോഗതിയിലേക്കു കൊണ്ടുപോയതും, പ്രത്യേകിച്ച് ഉമ്മൻചാണ്ടി സർക്കാർ എല്ലാ മേഖലകളിലും പിന്നോട്ട് പോയി എന്നുമാണ് മുഖ്യമന്ത്രിയുടെ വിമർശനം.
2016ൽ എൽഡിഎഫ് അധികാരത്തിൽ എത്തിയപ്പോൾ ആദ്യമായി പരിശോധിച്ച ഒന്നായിരുന്നു പെൻഷൻ കുടിശികയുടെ വലിപ്പം. തുടർഭരണം ലഭിച്ചതോടെ അനവധി നേട്ടങ്ങൾ സർക്കാർ കൈവരിച്ചു.
2021ൽ യുഡിഎഫ് വന്നിരുന്നുവെങ്കിൽ ഇന്ന് കൈവരിച്ച നേട്ടങ്ങൾ ഒന്നും നിലനിൽക്കില്ലായിരുന്നു എന്നും മുഖ്യമന്ത്രി ചൂണ്ടിക്കാട്ടി.
കേരളത്തിന്റെ ആരോഗ്യരംഗം ലോക രാജ്യങ്ങളെക്കാൾ മുന്നിലാണെന്നും ശിശുമരണ നിരക്ക് അമേരിക്കയേക്കാൾ താഴെയാണ് എന്നും അദ്ദേഹം ആവർത്തിച്ചു.
ഇതിനെത്തുടർന്ന് വിഷയത്തിൽ പ്രതികരണവുമായി സിപിഐഎം സംസ്ഥാന സെക്രട്ടറി എം.വി. ഗോവിന്ദനും രംഗത്തെത്തി.
“സംസ്ഥാനത്തെ അതിദാരിദ്ര്യം മാത്രമാണ് ഇല്ലാതായത്; ദാരിദ്ര്യം ഇപ്പോഴും സമൂഹത്തിൽ നിലനിൽക്കുന്നു” എന്നായിരുന്നു വിശദീകരണം.
മാധ്യമങ്ങൾ “അവിടെയും ഇവിടെയും ദരിദ്രർ ഉണ്ടെന്നു പറഞ്ഞ് വിമർശിക്കുന്നതിനു പകരം, അതിദരിദ്രർ ബാക്കിയുണ്ടെങ്കിൽ ചൂണ്ടിക്കാണിക്കണം” എന്നും എം.വി. ഗോവിന്ദൻ പറഞ്ഞു.
