മലപ്പുറം: പി.എം.എസ്.എ. മെമ്മോറിയൽ മലപ്പുറം ജില്ലാ സഹകരണ ആശുപത്രിയെ സംബന്ധിച്ച് കെ.ടി. ജലീൽ എം.എൽ.എ. നടത്തിയ പ്രതികരണം അടിയന്തിരമായി പിൻവലിക്കണമെന്ന് ആശുപത്രി സെക്രട്ടറി സഹീർ കാലടി ആവശ്യപ്പെട്ടു.
കേരളത്തിലെ 77 സഹകരണ ആശുപത്രികളിൽ അലോപതി വിഭാഗത്തിൽ ഓഹരി ഉടമകൾക്ക് ഏറ്റവും ഉയർന്ന ഡിവിഡന്റ് നൽകുന്ന സ്ഥാപനമാണ് പി.എം.എസ്.എ. ആശുപത്രി. കഴിഞ്ഞ അഞ്ച് വർഷവും തുടർച്ചയായി 11%നും അതിനുമുകളിലും ഡിവിഡന്റ് നൽകിയിട്ടുണ്ടെന്ന് സഹീർ വ്യക്തമാക്കി. കൂടാതെ, ഓഹരി ഉടമകൾക്കും ബന്ധുക്കൾക്കും 5% ചികിത്സാ ആനുകൂല്യവും വർഷം തോറും നൽകി വരുന്നു.
2024-ൽ മികച്ച സഹകരണ ആശുപത്രിക്കുള്ള കേരള സർക്കാർ അവാർഡ് നേടിയ സ്ഥാപനമാണ് ഇത്. ആഡിറ്റ് ക്ലാസിഫിക്കേഷൻ “A ഗ്രേഡ്” ആണെന്നും സൗജന്യ നിരക്കിൽ ഡയാലിസിസ് കേന്ദ്രം പ്രവർത്തിക്കുന്നുവെന്നും അദ്ദേഹം പറഞ്ഞു.
2025 ഫെബ്രുവരി 17-ന് കരുവാരക്കുണ്ടിൽ 150 ബെഡുള്ള സൂപ്പർ സ്പെഷ്യാലിറ്റി ശാഖയും സംസ്ഥാന സഹകരണ വകുപ്പ് മന്ത്രി ഉദ്ഘാടനം ചെയ്തിരുന്നു. ഇന്ന് 450 കിടക്കകളോടെ മൂന്ന് ആശുപത്രികൾ പി.എം.എസ്.എ.യുടെ കീഴിൽ പ്രവർത്തിക്കുന്നു.
ഡിവിഡന്റ് താരതമ്യം:
പെരിന്തൽമണ്ണ സഹകരണ ആശുപത്രി: 2023–24 → 3.5% 2022–23 → 2.5% 2021–22 → 1.5% പി.എം.എസ്.എ. മലപ്പുറം ജില്ലാ സഹകരണ ആശുപത്രി: 2023–24 → 11.5% 2022–23 → 11% 2021–22 → 11%
“ഈ കണക്കുകൾ ജില്ലാ സഹകരണ വകുപ്പ് ആഡിറ്റിംഗ് വിഭാഗത്തിൽ നിന്ന് തന്നെ പരിശോധിക്കാവുന്നതാണ്,” സഹീർ കൂട്ടിച്ചേർത്തു.
സഹകരണ ആശുപത്രികൾ തമ്മിൽ ഐക്യം നിലനിർത്തുന്നതിനിടയിലാണ് കെ.ടി. ജലീൽ എം.എൽ.എ. രാഷ്ട്രീയ പ്രസ്താവനകളിലൂടെ തെറ്റിദ്ധാരണ സൃഷ്ടിക്കുന്നത്. “ദയവായി സഹകരണ മേഖലയിൽ ഐക്യം തകർക്കരുത്,” സഹീർ ആവശ്യപ്പെട്ടു.
ബന്ധു നിയമന വിഷയത്തിൽ വീണ്ടും പ്രതികരിക്കാൻ നിർബന്ധിതനാക്കരുതെന്നും അദ്ദേഹം മുന്നറിയിപ്പ് നൽകി.
– സഹീർ കാലടി, സെക്രട്ടറി, പി.എം.എസ്.എ. മെമ്മോറിയൽ മലപ്പുറം ജില്ലാ സഹകരണ ആശുപത്രി
