തൃശ്ശൂർ: സിനിമാനടൻ Prithviraj Sukumaran നെ നേരിൽ കാണണമെന്നുള്ള അനീഷിന്റെ കാലങ്ങളായുള്ള ആഗ്രഹം സഫലമാകുന്നു. തൃശ്ശൂരിൽ നടന്ന സംസ്ഥാന ബഡ്സ് കലോത്സവത്തിൽ പങ്കെടുത്ത എ.സി. അനീഷ് (30) തന്റെ ആഗ്രഹം ഒരു പത്രവുമായി പങ്കുവെച്ചിരുന്നു. മാധ്യമവാർത്തയിലൂടെ വിവരം അറിഞ്ഞ പൃഥ്വിരാജ് ഉടൻ തന്നെ അനീഷിനെ നേരിൽ കാണാമെന്ന് ഉറപ്പ് നൽകി.
ഈ മാസം തന്നെ കൂടിക്കാഴ്ച നടക്കുമെന്നാണ് വിവരം. Asset Homes മാനേജിങ് ഡയറക്ടർ വി. സുനിൽകുമാറാണ് കൂടിക്കാഴ്ചയ്ക്ക് വഴിയൊരുക്കിയത്. അസറ്റ് ഹോംസ് ബ്രാൻഡ് അംബാസഡറാണ് പൃഥ്വിരാജ്.
സംസ്ഥാന ബഡ്സ് കലോത്സവത്തിൽ ലളിതഗാനത്തിൽ ഒന്നാം സ്ഥാനവും നാടൻപാട്ടിൽ രണ്ടാം സ്ഥാനവും അനീഷ് സ്വന്തമാക്കിയിരുന്നു. തൃശ്ശൂർ കൊണ്ടാഴിയിലെ കാരുണ്യ ബി.ആർ.സി.യിലെ പഠിതാവാണ് അദ്ദേഹം.
ചെറുപ്പത്തിൽ ചികിത്സാപിഴവിനെ തുടർന്ന് 12 വർഷം കിടപ്പിലായിരുന്ന അനീഷിന് തല മാത്രം വളരുന്ന അപൂർവ രോഗവും ബാധിച്ചു. കൂലിപ്പണിക്കാരായ നിർമലയും ചാക്കോയും ആണ് മാതാപിതാക്കൾ. നാലാം ക്ലാസ് വരെ മാത്രമാണ് ഔപചാരിക വിദ്യാഭ്യാസം. പാട്ട് കേട്ട് പഠിച്ചാണ് ലളിതഗാനത്തിലും നാടൻപാട്ടിലും കഴിവ് തെളിയിച്ചത്. മിമിക്രിയിലും പ്രാവീണ്യമുണ്ട്.
അടുത്തിടെ വാഹനാപകടത്തിൽ ഗുരുതരമായി പരിക്കേറ്റിരുന്നെങ്കിലും അതിജീവനത്തിന്റെ കരുത്തോടെ മുന്നേറുകയാണ് അനീഷ്.
