കൊച്ചി: കേരള ഫിനാൻഷ്യൽ കോർപറേഷനിൽ (കെ.എഫ്.സി) നിന്ന് ചട്ടങ്ങൾ ലംഘിച്ച് കോടികളുടെ വായ്പ തരപ്പെടുത്തിയെന്ന പരാതിയിൽ പി.വി. അൻവറിന് എൻഫോഴ്സ്മെന്റ് ഡയറക്ടറേറ്റിന്റെ (ഇ.ഡി) നോട്ടീസ്. കള്ളപ്പണം വെളുപ്പിക്കൽ നിരോധന നിയമപ്രകാരം രജിസ്റ്റർ ചെയ്ത കേസിൽ മൊഴി രേഖപ്പെടുത്തുന്നതിനായി വരും ബുധനാഴ്ച കൊച്ചിയിലെ മേഖലാ ഓഫീസിൽ ഹാജരാകാനാണ് നിർദ്ദേശം.
കഴിഞ്ഞ നവംബറിൽ അൻവറിന്റെ ഒതായിയിലെ വീട് ഉൾപ്പെടെയുള്ള കേന്ദ്രങ്ങളിൽ ഇ.ഡി നടത്തിയ റെയ്ഡിന് പിന്നാലെയാണ് നിർണ്ണായകമായ ഈ നീക്കം. റെയ്ഡിൽ പിടിച്ചെടുത്ത ഡിജിറ്റൽ രേഖകളുടെയും ബാങ്ക് ഇടപാടുകളുടെയും അടിസ്ഥാനത്തിലാണ് ചോദ്യം ചെയ്യൽ.
ആരോപണങ്ങൾ ഇങ്ങനെ:
മലപ്പുറം കെ.എഫ്.സി ശാഖയിൽ നിന്ന് 2015-ൽ മതിയായ ഈടില്ലാതെ 22.31 കോടി രൂപയുടെ വായ്പ തരപ്പെടുത്തിയെന്നാണ് വിജിലൻസ് കണ്ടെത്തിയിരുന്നത്. ഡ്രൈവറുടെയും ബന്ധുക്കളുടെയും പേരിൽ ആരംഭിച്ച കമ്പനികൾ വഴി വായ്പ എടുക്കുകയും, പിന്നീട് ഈ തുക സ്വന്തം ബിസിനസ്സ് ആവശ്യങ്ങൾക്കായി വകമാറ്റുകയും ചെയ്തു എന്നാണ് ഇ.ഡിയുടെ പ്രാഥമിക കണ്ടെത്തൽ. ഒരേ വസ്തു തന്നെ പല തവണ ഈടായി നൽകി കെ.എഫ്.സി ഉദ്യോഗസ്ഥരുടെ ഒത്താശയോടെ തട്ടിപ്പ് നടത്തിയെന്നും ഇ.ഡി സംശയിക്കുന്നു.
അന്വേഷണം ആസ്തി വർദ്ധനവിലേക്ക്
2016 മുതൽ 2021 വരെയുള്ള കാലയളവിൽ അൻവറിന്റെ ആസ്തിയിൽ ഏകദേശം 50 കോടിയുടെ വർദ്ധനവുണ്ടായതായി ഇ.ഡി നേരത്തെ കോടതിയെ അറിയിച്ചിരുന്നു. ഈ വരുമാനത്തിന്റെ സ്രോതസ്സ് വെളിപ്പെടുത്താൻ അൻവറിന് സാധിച്ചിട്ടില്ല. വിദേശത്തെ സ്വർണ്ണ ഖനന ഇടപാടുകൾ ഉൾപ്പെടെയുള്ള കാര്യങ്ങളും ഇ.ഡി അന്വേഷണ പരിധിയിൽ കൊണ്ടുവന്നേക്കും.
തിരുവനന്തപുരം വിജിലൻസ് സ്പെഷ്യൽ ഇൻവെസ്റ്റിഗേഷൻ ടീം രജിസ്റ്റർ ചെയ്ത കേസിന്റെ ചുവടുപിടിച്ചാണ് ഇ.ഡി അന്വേഷണം ഊർജിതമാക്കിയത്. കേസുമായി ബന്ധപ്പെട്ട ചില കെ.എഫ്.സി മുൻ ഉദ്യോഗസ്ഥരെയും വരും ദിവസങ്ങളിൽ ചോദ്യം ചെയ്തേക്കും.
