ശബരിമല സ്വർണക്കവർച്ച കേസിൽ രാജ്യാന്തര വിഗ്രഹക്കടത്ത് സംഘവുമായി ബന്ധമുണ്ടെന്ന വ്യവസായിയുടെ മൊഴി പ്രത്യേക അന്വേഷണ സംഘം (SIT) രേഖപ്പെടുത്തി. കോൺഗ്രസ് നേതാവ് രമേശ് ചെന്നിത്തല നടത്തിയ വെളിപ്പെടുത്തൽ ഗൗരവമുള്ളതാണെന്ന് വിലയിരുത്തിയതിന്റെ തുടർച്ചയായാണ് വ്യവസായിയെ വിളിച്ചു വരുത്തി രഹസ്യമായി മൊഴിയെടുത്തത്. കേസിൽ അറസ്റ്റിലായ എ. പത്മകുമാറിനെതിരെയാണ് വ്യവസായിയുടെ മൊഴിയെന്നാണ് സൂചന.
ദ്വാരപാലക ശിൽപത്തിന് സ്വർണം പൂശിയതുമായി ബന്ധപ്പെട്ട് അധികമായി ഉണ്ടായ സ്വർണം ഉപയോഗിക്കാൻ അനുമതി തേടിയുള്ള കത്തുകളും അതിനോട് ബന്ധപ്പെട്ട ഫയലുകളും SITക്ക് ലഭിച്ചിട്ടുണ്ട്. ഈ രേഖകളിൽ ചില അസ്വാഭാവികതകൾ കണ്ടെത്തിയതായും അന്വേഷണ സംഘം പറയുന്നു. ഉണ്ണികൃഷ്ണൻ പോറ്റിക്ക് അനുകൂലമായ ശുപാർശകൾ ഉണ്ടായിട്ടും അദ്ദേഹത്തെ ഔദ്യോഗികമായി അറിയിച്ചതിന്റെ തെളിവില്ലെന്നതും അന്വേഷണ പരിധിയിലാണ്.
പുരാവസ്തു കള്ളക്കടത്ത് സംഘങ്ങളുമായുള്ള ബന്ധം അന്വേഷിക്കണമെന്ന് ആവശ്യപ്പെട്ട് ചെന്നിത്തല നേരത്തെ കത്ത് നൽകിയിരുന്നു. ഒരു വ്യവസായിയിൽ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് താൻ വിഷയം പുറത്തു പറഞ്ഞതെന്ന് ചെന്നിത്തല വ്യക്തമാക്കി. അദ്ദേഹത്തിന്റെ മൊഴിക്ക് പിന്നാലെ വ്യവസായിയുടെയും മൊഴി രേഖപ്പെടുത്തി. ഈ മൊഴിയിൽ നിരവധി ഞെട്ടിക്കുന്ന വിവരങ്ങൾ ഉണ്ടെന്നാണ് സൂചന. തുടർ അന്വേഷണത്തിൽ കൂടുതൽ നിർണായക അറസ്റ്റുകൾ ഉണ്ടാകാമെന്ന സാധ്യതയും അന്വേഷണസംഘം മുന്നോട്ടുവയ്ക്കുന്നു.
