ലണ്ടൻ: യോഗ ക്ലാസിന്റെ അവസാനത്തിൽ വിദ്യാർത്ഥികൾ ശവാസനം ചെയ്യുന്നത് കണ്ട വഴിയാത്രക്കാർ അത് കൂട്ടക്കൊലയായി തെറ്റിദ്ധരിച്ചു. പിന്നാലെ പൊലീസും ആംബുലൻസും സ്ഥലത്തെത്തി.
യുകെയിലെ ലിങ്കൺഷെയറിലെ സീസ്കേപ്പ് കഫേയിൽ 22 കാരിയായ മില്ലി ലോസിന്റെ നേതൃത്വത്തിൽ നടന്ന യോഗാ ക്ലാസിലായിരുന്നു സംഭവം. 2023 സെപ്റ്റംബർ 7-നാണ് സംഭവം നടന്നത്.
അടുത്തിടെ യോഗാ പരിശീലകൻ റിയൽ ഗൗരവ് ചൗഹാൻ ഇൻസ്റ്റാഗ്രാമിൽ വീഡിയോ പങ്കുവച്ചതോടെയാണ് സംഭവം പുറത്തറിയുന്നത്. “ശവാസനം കണ്ട അയൽവാസി 911-ൽ വിളിച്ച് കൂട്ടക്കൊലയെന്ന് പരാതിപ്പെട്ടു” എന്ന കുറിപ്പോടെയായിരുന്നു വീഡിയോ. രണ്ടര ലക്ഷത്തിലേറെ പേർ ഇതിനകം വീഡിയോ ലൈക്ക് ചെയ്തു.
പോലീസ് സ്ഥലത്തെത്തിയപ്പോൾ ആരും അനങ്ങാതെ കിടന്നത് കണ്ടു. അടുത്ത് പോയപ്പോൾ മാത്രമാണ് യോഗാസനം ചെയ്യുകയാണെന്ന് വ്യക്തമായത്. പിന്നീട് സംഭവം റിപ്പോർട്ട് ചെയ്ത അയൽവാസിയെ പോലീസ് വിശദീകരിച്ച് ബോധ്യപ്പെടുത്തി.
മില്ലി ലോസ് പറഞ്ഞു: “ഞാൻ ഡ്രം വായിച്ച് ശവാസനം ചെയ്യുന്ന വിദ്യാർത്ഥികൾക്കിടയിലൂടെ നടന്നുകൊണ്ടിരിക്കുകയായിരുന്നു. വഴിയാത്രക്കാരായ ദമ്പതികൾ നായയുമായി നോക്കി കടന്നുപോയി. എന്നാൽ അത് പോലീസിനെ വിളിക്കുന്നതിന് ഇടയാക്കുമെന്ന് കരുതിയില്ല.”
സീസ്കേപ്പ് കഫേ പിന്നീട് ഫേസ്ബുക്കിലൂടെ സംഭവത്തെക്കുറിച്ച് വിശദീകരിക്കുകയും തെറ്റിദ്ധാരണയിലൂടെയായിരുന്നുവെന്ന് വ്യക്തമാക്കുകയും ചെയ്തു. സംഭവം സമൂഹമാധ്യമങ്ങളിൽ വൈറലായി.
