തൃശ്ശൂർ: കേന്ദ്രമന്ത്രി സുരേഷ് ഗോപി നടത്തിയ പ്രചാരണ പ്രസംഗങ്ങൾക്കെതിരേ തൃശ്ശൂർ കോർപറേഷൻ യോഗത്തിൽ യുഡിഎഫും എൽഡിഎഫും രൂക്ഷ വിമർശനമുയർത്തി. താൻ അനുവദിച്ച ഫണ്ട് കോർപറേഷൻ ചെലവഴിച്ചില്ലെന്ന സുരേഷ് ഗോപിയുടെ വാദം തെറ്റിദ്ധാരണാജനകമാണെന്നും അങ്ങനെയൊരു ഫണ്ട് കോർപറേഷന് ലഭിച്ചിട്ടില്ലെന്നും ഇരു മുന്നണികളും വ്യക്തമാക്കി.
ഫണ്ട് വിവാദത്തിൽ തുറന്നടിച്ച് അംഗങ്ങൾ
കേന്ദ്രമന്ത്രി ജനങ്ങളെ തെറ്റിദ്ധരിപ്പിക്കുകയാണെന്ന് എൽഡിഎഫ്, യുഡിഎഫ് അംഗങ്ങളായ രാജൻ പല്ലൻ, ജോൺ ഡാനിയേൽ, വർഗീസ് കണ്ടംകുളത്തി, സാറാമ്മ റോബ്സൺ, അനീസ് എന്നിവർ തുറന്നടിച്ചു. സുരേഷ് ഗോപിയുടെ വിജയം ജനങ്ങൾക്കിടയിൽ പശ്ചാത്താപമുണ്ടാക്കുന്നുവെന്നും തെറ്റായ പരാമർശം മന്ത്രി പിൻവലിക്കണമെന്നും കൗൺസിൽ ആവശ്യപ്പെട്ടു.
മേയറുടെ പ്രതികരണം
ഫണ്ട് ലഭിച്ചിട്ടില്ലെന്നും, അത് ചെലവഴിച്ചില്ലെന്ന് ജനപ്രതിനിധി പറയുന്നത് ശരിയല്ലെന്നും മേയർ എം.കെ. വർഗീസ് പറഞ്ഞു. എംപിയും മന്ത്രിയുമെന്ന നിലയിൽ തൃശ്ശൂരിലെ പദ്ധതികൾ നടപ്പാക്കാൻ സുരേഷ് ഗോപി മുൻകൈയെടുക്കണമെന്നും മേയർ ആവശ്യപ്പെട്ടു. കോർപറേഷൻ സ്റ്റേഡിയത്തിന് കേന്ദ്രം നൽകിയ 19 കോടി രൂപയ്ക്ക് ഭരണാധികാരികൾ തുരങ്കം വെച്ചു എന്ന സുരേഷ് ഗോപിയുടെ പ്രസ്താവന തെറ്റാണെന്നും അങ്ങനെയൊരു ഫണ്ട് കോർപറേഷന് ലഭിച്ചിട്ടില്ലെന്നും മേയർ ആവർത്തിച്ചു.
ഫണ്ട് ചെലവഴിക്കാത്ത ഭരണസമിതിയാണിതെന്നായിരുന്നു ബിജെപി അംഗങ്ങളായ വിനോദ് പൊള്ളാഞ്ചേരിയുടെയും എൻ. പ്രസാദിന്റെയും പ്രതികരണം.
ഖേലോ ഇന്ത്യ പദ്ധതിയും നിർമാണ വിവാദവും
ഖേലോ ഇന്ത്യ പദ്ധതിയിൽ എട്ടുലൈൻ സിന്തറ്റിക് ട്രാക്കിന് 9.5 കോടി രൂപയും ഫുട്ബോൾ ടർഫിനും അനുബന്ധ സൗകര്യങ്ങൾക്കുമായി 4.70 കോടി രൂപയും നൽകുമ്പോൾ, ടർഫ് നിർമാണത്തിന് യൂണിഫൈഡ് ഫുട്ബോൾ സ്പോർട്സ് ഡിവലപ്പ്മെന്റ് പ്രൈവറ്റ് ലിമിറ്റഡിനെ ചുമതലപ്പെടുത്തുന്നത് എന്തിനാണെന്ന് രാജൻ ജെ. പല്ലൻ ചോദിച്ചു. ഖേലോ ഇന്ത്യയിൽ കോർപറേഷൻ നൽകിയ 14.20 കോടിയുടെ ഒറ്റ പദ്ധതി രണ്ടായി നൽകണമെന്ന നിർദേശം യോഗം അംഗീകരിച്ചു.
ചർച്ചയിൽ ജയപ്രകാശ് പുവത്തിങ്കൽ, സിന്ധു ആന്റോ ചാക്കോള, മൂകേഷ് കൂളപറമ്പിൽ, കെ. രാമനാഥൻ, പൂർണിമ സുരേഷ് എന്നിവരും പങ്കെടുത്തു.
തെരുവുനായ ശല്യവും അനധികൃത നിർമാണവും
തെരുവുനായ ശല്യവും ശക്തൻനഗറിലെ വെള്ളക്കെട്ടും നടുവിലാലിലെ അനധികൃത നിർമാണവും കൗൺസിലിൽ വിമർശനമായി ഉയർന്നു. തെരുവുനായ്ക്കളുടെ ഉപദ്രവം കൊണ്ട് ജനങ്ങൾ വലയുകയാണെന്ന് ഇ.വി. സുനിൽരാജ് പറഞ്ഞപ്പോൾ, ഒന്നും ചെയ്യാൻ കഴിയില്ല എന്ന് മേയർ മറുപടി നൽകിയത് ശ്രദ്ധേയമായി.
നടുവിലാൽ കഴിഞ്ഞ് എംജി റോഡിലേക്ക് പ്രവേശിക്കുന്നിടത്ത് ഭരണ നേതൃത്വത്തിന്റെയും സിപിഎം നേതാക്കളുടെയും ഒത്താശയോടെ അനധികൃത കെട്ടിടം നിർമിച്ചിട്ടുണ്ടെന്ന് രാജൻ പല്ലൻ ആരോപിച്ചു. എംജി റോഡ് വികസനത്തിന് കാത്തുനിൽക്കുമ്പോളാണ് ഈ നിർമാണം നടക്കുന്നതെന്നും അദ്ദേഹം ചൂണ്ടിക്കാട്ടി.
