കണ്ണൂർ: തിരുവനന്തപുരം മെഡിക്കൽ കോളേജ് യൂറോളജി വിഭാഗം തലവൻ ഡോ. ഹാരിസ് ചിറയ്ക്കൽ കുറച്ചുകൂടി ഉഷാറായി പോരാടണമെന്ന് കഥാകൃത്ത് ടി. പത്മനാഭൻ അഭിപ്രായപ്പെട്ടു. “ഡോക്ടർ അങ്ങേയറ്റം സത്യസന്ധനാണ്. പക്ഷേ പോരാട്ടം നനഞ്ഞതാകരുത്. ജനങ്ങളുടെ നന്മയ്ക്കായാണ് അദ്ദേഹം പറയുന്നത്. അതിന് കുറച്ച് കൂടുതൽ ഉഷാറുകൂടി വേണം,” അദ്ദേഹം പറഞ്ഞു.
‘രാജ്യത്തെ സിസ്റ്റം മുഴുവൻ എനിക്ക് എതിരായി നിന്നിട്ടും ഞാൻ നിർഭയം പോരാടിയിട്ടുണ്ട്. പോയാൽ പോട്ടെടാ. ഒന്നുകിൽ ഭ്രാന്തനാകണം, അല്ലെങ്കിൽ രാജിവെക്കണം. അവസാനംവരെ പോരാടണം,’ എന്നും പത്മനാഭൻ വ്യക്തമാക്കി.
ഫാക്ടിനെതിരെ നടത്തിയ തന്റെ നീണ്ട നിയമ പോരാട്ടം ഓർമ്മപ്പെടുത്തി പത്മനാഭൻ പറഞ്ഞു: “ഫാക്ടിനെതിരെ പറവൂർ മുൻസിഫ് കോടതി മുതൽ സുപ്രീംകോടതി വരെ കേസ് നടത്തി. ഹൈക്കോടതിയിൽ പരിചയക്കാരായ ജഡ്ജിമാർ ഉണ്ടായിട്ടും ആരും സ്വീകരിച്ചില്ല. ഒടുവിൽ ജസ്റ്റിസ് പരിപൂർണനും മറ്റൊരു മലയാളി ജഡ്ജിയും മാത്രമാണ് അനീതിയെ അംഗീകരിച്ചത്. സുപ്രീംകോടതിയിൽ 11 അഭിഭാഷകർ ഫാക്ടിനുവേണ്ടി, എനിക്കുവേണ്ടി സുബ്രഹ്മണ്യൻ പോറ്റി മാത്രം. എന്റെ സത്യവാങ്മൂലത്തിന്റെ അടിസ്ഥാനത്തിലാണ് കേസ് പരിഗണനയ്ക്കില്ലാതെ തള്ളിയത്. ജയിച്ചെങ്കിലും പ്രായം കഴിഞ്ഞുപോയതിനാൽ ഗുണമുണ്ടായില്ല.”
അടൂർ ഗോപാലകൃഷ്ണനുമായി ബന്ധപ്പെട്ട വിവാദത്തിലും പത്മനാഭൻ പ്രതികരിച്ചു. “അടൂർ സുഹൃത്തല്ല, വിരോധിയുമല്ല. പക്ഷേ ഞാൻ അക്ഷരംപ്രതി അദ്ദേഹത്തോടൊപ്പമാണ്. വിവാദ പ്രസംഗം കേട്ടപ്പോൾ തന്നെ വിഷയമാകുമെന്ന് അറിഞ്ഞു. ശ്രീകുമാരൻ തമ്പിയിൽ നിന്ന് നമ്പർ വാങ്ങി അടൂരിനെ വിളിച്ച് പിന്തുണ അറിയിച്ചു,” അദ്ദേഹം പറഞ്ഞു.
