അടുത്ത നിയമസഭ തിരഞ്ഞെടുപ്പിനെ ലക്ഷ്യമാക്കി സംസ്ഥാനത്ത് നിരവധി ക്ഷേമ പദ്ധതികളുമായി യു.ഡി.എഫ് രംഗത്ത്. സ്ത്രീകൾക്ക് കെ.എസ്.ആർ.ടി.സി ബസുകളിൽ സൗജന്യ യാത്ര ഉൾപ്പെടെ നിരവധി ഉറപ്പുകളാണ് യു.ഡി.എഫ് മുന്നോട്ടുവച്ചിരിക്കുന്നത്.
കോളജ് വിദ്യാർത്ഥിനികൾക്ക് പ്രതിമാസം 1,000 രൂപ ധനസഹായം നൽകുമെന്നും പ്രഖ്യാപനത്തിൽ പറയുന്നു. സാമൂഹിക ക്ഷേമ പെൻഷൻ നിലവിലെ തുകയിൽ നിന്ന് 3,000 രൂപയായി ഉയർത്തുമെന്നും യു.ഡി.എഫ് ഉറപ്പുനൽകുന്നു.
ആരോഗ്യ മേഖലയിലും വലിയ പദ്ധതിയാണ് പ്രഖ്യാപിച്ചിരിക്കുന്നത്. ഓരോ കുടുംബത്തിനും 25 ലക്ഷം രൂപവരെ ചികിത്സാ ചെലവ് ഉൾക്കൊള്ളുന്ന “ഉമ്മൻ ചാണ്ടി സൗജന്യ ആരോഗ്യ ഇൻഷുറൻസ് പദ്ധതി” നടപ്പിലാക്കുമെന്നാണ് വാഗ്ദാനം.
യുവ സംരംഭകരെ പ്രോത്സാഹിപ്പിക്കുന്നതിനായി 5 ലക്ഷം രൂപവരെ പലിശരഹിത വായ്പ നൽകുമെന്നും യു.ഡി.എഫ് വ്യക്തമാക്കുന്നു.
അതേസമയം, സംസ്ഥാനത്തെ വയോജനങ്ങളുടെ ക്ഷേമം, സംരക്ഷണം, അന്തസ് എന്നിവ ഉറപ്പാക്കുന്നതിനായി പ്രത്യേക വകുപ്പ് രൂപീകരിക്കുമെന്നും പ്രഖ്യാപനത്തിൽ പറയുന്നു.
സാമൂഹിക ക്ഷേമവും യുവജന–സ്ത്രീ ശാക്തീകരണവും ലക്ഷ്യമിട്ട് നിരവധി പദ്ധതികളാണ് യു.ഡി.എഫ് മുന്നോട്ടുവച്ചിരിക്കുന്നതെന്ന് നേതാക്കൾ വ്യക്തമാക്കി.
