ന്യൂഡൽഹി: മിഡിൽ ഈസ്റ്റിലെ സംഘർഷം ശക്തമാകുന്നതിനിടെ ഇന്ത്യൻ റിഫൈനർമാർക്ക് റഷ്യൻ ക്രൂഡ് ഓയിൽ വാങ്ങാൻ 30 ദിവസത്തെ ഇളവ് അനുവദിച്ച് അമേരിക്ക.
ഇതു സംബന്ധിച്ച പ്രഖ്യാപനം യു.എസ് ട്രഷറി സെക്രട്ടറി സ്കോട്ട് ബെസെന്റ് നടത്തി. പശ്ചിമേഷ്യയിൽ സംഘർഷം രൂക്ഷമാകുന്ന സാഹചര്യത്തിൽ ഇന്ത്യയ്ക്ക് ആശ്വാസമാകുന്ന തീരുമാനമാണിത്.
പ്രസിഡന്റ് ഡൊണാൾഡ് ട്രംപിന്റെ ഊർജ്ജ അജണ്ടയുടെ ഭാഗമായി എണ്ണയും വാതക ഉൽപാദനവും റെക്കോർഡ് നിലയിലെത്തിയതായി അദ്ദേഹം വ്യക്തമാക്കി.
ആഗോള വിപണിയിലേക്ക് എണ്ണ വിതരണം തടസ്സപ്പെടാതിരിക്കാൻ ഇന്ത്യൻ റിഫൈനർമാർക്ക് റഷ്യൻ എണ്ണ വാങ്ങാൻ ട്രഷറി വകുപ്പ് താൽക്കാലികമായി 30 ദിവസത്തെ ഇളവ് അനുവദിക്കുകയാണെന്ന് അദ്ദേഹം സമൂഹമാധ്യമ കുറിപ്പിൽ വ്യക്തമാക്കി.
കടലിൽ കുടുങ്ങിക്കിടക്കുന്ന എണ്ണയുമായി ബന്ധപ്പെട്ട ഇടപാടുകൾക്കാണ് ഈ അനുമതി ബാധകമാകുക. ഇതുവഴി റഷ്യൻ സർക്കാരിന് വലിയ സാമ്പത്തിക നേട്ടമുണ്ടാകില്ലെന്നും അദ്ദേഹം പറഞ്ഞു.
അതിനൊപ്പം ഇന്ത്യ അമേരിക്കയുടെ പ്രധാന പങ്കാളിയാണെന്നും, യുഎസ് എണ്ണ വാങ്ങൽ ഇന്ത്യ വർദ്ധിപ്പിക്കുമെന്ന പ്രതീക്ഷയും അദ്ദേഹം പ്രകടിപ്പിച്ചു.
ആഗോള ഊർജ്ജ വിതരണത്തെ ബാധിക്കുന്ന ഇറാന്റെ നടപടികളാൽ ഉണ്ടായ സമ്മർദ്ദം കുറയ്ക്കാനാണ് ഈ താൽക്കാലിക തീരുമാനം എന്നും അദ്ദേഹം വ്യക്തമാക്കി.
റഷ്യൻ എണ്ണ ഇറക്കുമതി കുറഞ്ഞിരുന്നു
ജനുവരിയിൽ ഇന്ത്യയുടെ റഷ്യൻ ക്രൂഡ് ഓയിൽ ഇറക്കുമതി പ്രതിദിനം 1.1 ദശലക്ഷം ബാരലായി കുറഞ്ഞിരുന്നു.
2022 നവംബറിന് ശേഷമുള്ള ഏറ്റവും താഴ്ന്ന നിരക്കായിരുന്നു ഇത്.
യുഎസ് തീരുവകളിൽ നിന്ന് രക്ഷപ്പെടുന്നതിനായി ഇന്ത്യയുടെ മൊത്തം എണ്ണ ഇറക്കുമതിയിൽ റഷ്യയുടെ വിഹിതം 21.2 ശതമാനമായി കുറഞ്ഞിരുന്നു. എന്നാൽ ഫെബ്രുവരിയിൽ ഇത് വീണ്ടും ഏകദേശം 30 ശതമാനമായി ഉയർന്നു എന്നാണ് കണക്കുകൾ.
എണ്ണവില ഉയരുന്നു
ഇറാൻ യുദ്ധം ശക്തമായതോടെ ഹോർമുസ് കടലിടുക്ക് അടച്ചതിന്റെ പശ്ചാത്തലത്തിൽ ആഗോള എണ്ണവില ഉയരുകയാണ്.
ബ്രെന്റ് ക്രൂഡ് ഓയിൽ ഇന്ന് രാവിലെ ബാരലിന് 83.07 ഡോളറായി ഉയർന്നു.
എന്നാൽ ഇന്ത്യയിൽ പെട്രോൾ, ഡീസൽ വില വർദ്ധിക്കാനുള്ള സാധ്യത നിലവിൽ ഇല്ലെന്നാണ് ബന്ധപ്പെട്ട വൃത്തങ്ങൾ വ്യക്തമാക്കുന്നത്.
