കോഴിക്കോട്: സംസ്ഥാന രാഷ്ട്രീയത്തിൽ ഞെട്ടിക്കുന്ന വെളിപ്പെടുത്തലുകൾ ഉടൻ പുറത്തുവരുമെന്ന് പ്രതിപക്ഷ നേതാവ് വി.ഡി. സതീശൻ. “കേരളം ഞെട്ടുന്ന ഒരു വാർത്ത വരും, സിപിഎം കാത്തിരിക്കണം. സിപിഎം അധികം അഹങ്കരിക്കേണ്ട. ചില കാര്യങ്ങൾ വാരാനുണ്ട്,” അദ്ദേഹം വാർത്താ സമ്മേളനത്തിൽ മുന്നറിയിപ്പ് നൽകി.
രാഹുല് മാങ്കൂട്ടത്തിലിന്റെ വിവാദം അടഞ്ഞ അധ്യായമായെന്നും, സിപിഎം അത് ചര്ച്ചയാക്കുന്നത് എം.വി. ഗോവിന്ദന്റെ മകനെതിരായ ഗുരുതര ആരോപണം മറയ്ക്കാനാണെന്നും സതീശൻ ആരോപിച്ചു.
അതേസമയം, ബിജെപിയെ വെല്ലുവിളിച്ചും സതീശൻ രംഗത്തെത്തി. “പ്രതിഷേധത്തിന് ഉപയോഗിച്ച കാളയെ ഉപേക്ഷിക്കരുത്. വൈകാതെ ബിജെപി സംസ്ഥാന അധ്യക്ഷന്റെ വീട്ടിലേക്ക് കാളയുമായി തന്നെ പോകേണ്ടിവരും,” അദ്ദേഹം പറഞ്ഞു.
സർക്കാരിനെതിരെയും സതീശൻ ഗുരുതര ആരോപണം ഉന്നയിച്ചു. ജിഎസ്ടിയിൽ വൻ അഴിമതി നടക്കുന്നുണ്ടെന്നും, സർക്കാരിലേക്ക് വരേണ്ട തുക ഇടനിലക്കാരെ വെച്ച് കൊള്ളയടിക്കുകയാണെന്നും അദ്ദേഹം ആരോപിച്ചു.
തുടർന്ന്, സുരക്ഷാ വീഴ്ചകളിലും പ്രതിപക്ഷ നേതാവ് പൊലീസ് നടപടിയെ ചോദ്യം ചെയ്തു. കണ്ടോൺമെന്റ് ഹൗസിൽ തുടർച്ചയായി സുരക്ഷാ വീഴ്ചകൾ ഉണ്ടാകുന്നതിൽ ശക്തമായ വിമർശനം ഉന്നയിച്ച സതീശൻ, നടപടിയാവശ്യപ്പെട്ട് ഡിജിപിക്ക് കത്ത് നൽകി. ഇന്നലെ പോർവിളികളുമായി എസ്എഫ്ഐ പ്രവർത്തകർ പ്രധാന ഗേറ്റുവരെ എത്തിയപ്പോൾ, പൊലീസ് തടയാൻ തയ്യാറായിരുന്നില്ലെന്നും, സുരക്ഷാ വീഴ്ചയിൽ അടിയന്തര നടപടി വേണമെന്നും അദ്ദേഹം ആവശ്യപ്പെട്ടു.
“ആർക്കും എന്റെ വസതിയിൽ കയറി അക്രമം നടത്താവുന്ന അവസ്ഥയാണ്. പൊലീസിന്റെ വീഴ്ച ആശങ്കാജനകമാണ്,” സതീശൻ ആരോപിച്ചു.
👉 യൂഡിഎഫ് രാഷ്ട്രീയ നീക്കങ്ങളും ശക്തമായ പ്രതികരണങ്ങളും സംസ്ഥാന രാഷ്ട്രീയത്തിൽ ചൂടേറിയ ചര്ച്ചകള്ക്ക് വഴി തുറക്കുകയാണ്.
