ഡബ്ല്യൂസിസി അംഗങ്ങളെ പരോക്ഷമായി പരിഹസിച്ച് വിജയ് ബാബു

കൊച്ചി: ഗീതു മോഹൻദാസ് സംവിധാനം ചെയ്ത ‘ടോക്സിക്’ സിനിമയുടെ ടീസർ പുറത്തിറങ്ങിയതിന് പിന്നാലെ ഉയർന്ന വിവാദങ്ങൾക്കിടയിൽ, ഗീതു ഉൾപ്പെടുന്ന വുമൺ ഇൻ സിനിമ കളക്ടീവ് (WCC) അംഗങ്ങളെ പരോക്ഷമായി പരിഹസിച്ച് നിർമാതാവും നടനുമായ വിജയ് ബാബു രംഗത്തെത്തി.

ടീസർ സ്ത്രീ വിരുദ്ധമാണെന്നും, ഗീതു മോഹൻദാസ് മുൻ നിലപാടുകളിൽ നിന്ന് മലക്കം മറിഞ്ഞുവെന്നുമുള്ള ആരോപണങ്ങൾ സാമൂഹ്യ മാധ്യമങ്ങളിൽ വ്യാപകമായി ഉയരുന്നതിനിടെയാണ് വിജയ് ബാബുവിന്റെ പ്രതികരണം. ഫേസ്ബുക്കിൽ പങ്കുവെച്ച കുറിപ്പിൽ സംഘടനയുടെ പേര് നേരിട്ട് പരാമർശിക്കാതെയാണ് അദ്ദേഹം ഡബ്ല്യൂസിസിയെ ലക്ഷ്യംവെച്ചത്.

‘ഇരട്ടത്താപ്പിന്റെ റാണിമാർ’ എന്നാണ് അദ്ദേഹം കുറിപ്പിൽ വിശേഷിപ്പിച്ചത്. പുരുഷന്മാരെ ആക്രമിക്കണമെന്ന് തോന്നുമ്പോൾ സ്ത്രീകളായി ഒരു ‘കൂട്ടായ്മ’യായി മാറുന്നവരാണെന്നും, സ്വന്തം താൽപ്പര്യങ്ങൾക്കായി ഒന്നിച്ചുനിന്ന് ആക്രമിച്ച ശേഷം അടുത്ത പ്രശ്നം ഉണ്ടാകുന്നത് വരെ പിരിഞ്ഞുപോകുന്നവരാണെന്നും വിജയ് ബാബു ആരോപിച്ചു. ഇവർക്ക് വ്യക്തമായ മാനദണ്ഡങ്ങളോ നയങ്ങളോ ഇല്ലെന്നും, ഇത് കേവലം ഒരു വാട്സാപ്പ് ഗ്രൂപ്പിനേക്കാൾ കൂടുതലല്ലെന്നും കുറിപ്പിൽ പറയുന്നു.

അതേസമയം, കന്നഡ സൂപ്പർതാരം യഷിനെ നായകനാക്കി ഗീതു മോഹൻദാസ് സംവിധാനം ചെയ്യുന്ന ‘ടോക്സിക്: എ ഫെയറി ടെയിൽ ഫോർ ഗ്രോൺ-അപ്‌സ്’ എന്ന ചിത്രത്തിന്റെ ടീസർ യൂട്യൂബിൽ മില്യൺ കണക്കിന് കാഴ്ചക്കാരെ നേടിയിട്ടുണ്ട്. ‘മൂത്തോൻ’ എന്ന ചിത്രത്തിന് ശേഷം ഗീതു സംവിധാനം ചെയ്യുന്ന ഈ ബിഗ് ബജറ്റ് ചിത്രം ആക്ഷനും സ്റ്റൈലും ഒത്തുചേരുന്നതാണെന്ന് ടീസർ സൂചിപ്പിക്കുന്നു. ‘കെജിഎഫ് 2’ന്റെ വൻ വിജയത്തിന് ശേഷം നാല് വർഷങ്ങൾക്ക് ശേഷമാണ് യഷിന്റെ പുതിയ ചിത്രം എത്തുന്നത്.

ടീസർ പുറത്തിറങ്ങിയതോടെ ഗീതു മോഹൻദാസിനെതിരെ ശക്തമായ സൈബർ ആക്രമണമാണ് നടക്കുന്നത്. ‘ഇതാണോ സ്ത്രീ ശാക്തീകരണം’ എന്ന ചോദ്യമുയർത്തിയും, ടീസറിലെ ദൃശ്യങ്ങൾ അശ്ലീലമാണെന്ന ആരോപണവുമായി വിമർശനങ്ങൾ ഉയരുന്നുണ്ട്. അതേസമയം, ടീസർ ബോൾഡും മനോഹരവുമാണെന്ന് പറഞ്ഞ് സംവിധായികയെ പിന്തുണയ്ക്കുന്നവരും സോഷ്യൽ മീഡിയയിൽ സജീവമാണ്.

നയൻതാര, രുക്മിണി വസന്ത്, താര സുതാര്യ, കിയാര അദ്വാനി എന്നിവരടങ്ങുന്ന വലിയ താരനിരയാണ് ചിത്രത്തിൽ അണിനിരക്കുന്നത്. യഷും ഗീതു മോഹൻദാസും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. കന്നഡ, ഇംഗ്ലീഷ് ഭാഷകളിൽ ഒരേസമയം ചിത്രീകരിച്ച ‘ടോക്സിക്’ ഹിന്ദി, തമിഴ്, തെലുങ്ക്, മലയാളം ഉൾപ്പെടെ നിരവധി ഭാഷകളിൽ റിലീസ് ചെയ്യും. 2026 മാർച്ച് 19നാണ് സിനിമയുടെ റിലീസ് പ്രഖ്യാപിച്ചിരിക്കുന്നത്.