പട്ന: കോൺഗ്രസ് പുറത്തിറക്കിയ എഐ വീഡിയോ വിവാദത്തിലേക്ക്. പ്രധാനമന്ത്രി നരേന്ദ്ര മോദിയുടെ പരേതയായ അമ്മ ഹീരാബെൻ സ്വപ്നത്തിൽ മകനോട് പ്രത്യക്ഷപ്പെടുന്നതായി ചിത്രീകരിച്ച വീഡിയോയാണ് വിവാദത്തിന് കാരണം.
“എന്നെ വോട്ടിനായി ഉപയോഗിക്കരുത്” എന്ന സന്ദേശത്തോടെയാണ് എഐ കഥാപാത്രത്തെ അവതരിപ്പിച്ചിരിക്കുന്നത്. ബിഹാർ കോൺഗ്രസ് പുറത്തിറക്കിയ വീഡിയോയിൽ, മോദിയുടെ അമ്മയെ അനുകരിച്ച കഥാപാത്രം രാഷ്ട്രീയത്തിൽ തന്റെ പേര് ഉപയോഗിച്ചതിനായി മോദിയെ ശാസിക്കുകയും, മോദിയോട് സാമ്യമുള്ള എഐ കഥാപാത്രം ഞെട്ടലോടെ ഉണരുന്നതോടെയാണ് രംഗം അവസാനിക്കുന്നതും.
https://x.com/incbihar/status/1965757886778511475?s=46
“സാഹിബിന്റെ സ്വപ്നങ്ങളിൽ അമ്മ പ്രത്യക്ഷപ്പെടുന്നു. ഈ രസകരമായ സംഭാഷണം കാണുക” എന്ന അടിക്കുറിപ്പോടെയാണ് വീഡിയോ പുറത്തിറക്കിയത്.
കോൺഗ്രസിന്റെ നടപടി മോദിയുടെ അമ്മയെ അപമാനിക്കലാണെന്ന് ബിജെപി ആരോപിച്ചു. പ്രതിപക്ഷം വിലകുറഞ്ഞ രാഷ്ട്രീയ തന്ത്രങ്ങൾക്കാണ് വഴിമാറുന്നതെന്ന് ബിജെപി നേതാക്കൾ പറഞ്ഞു.
ബിഹാറിൽ രാഹുൽ ഗാന്ധിയുടെ നേതൃത്വത്തിൽ നടന്ന വോട്ടർ അധികാർ യാത്രയ്ക്കിടെ തന്നെത്താനും അമ്മയ്ക്കുമെതിരെ അധിക്ഷേപകരമായ പരാമർശങ്ങളുണ്ടായിരുന്നുവെന്ന് പ്രധാനമന്ത്രി നേരത്തെ പറഞ്ഞിരുന്നു. അതിന്റെ പിന്നാലെയാണ് പുതിയ വിവാദം.
ബിജെപി ദേശീയ വക്താവ് പ്രദീപ് ഭണ്ഡാരി പ്രതികരിച്ചു:
“രാഹുൽ ഗാന്ധിയുടെ നിർദ്ദേശപ്രകാരം, പ്രധാനമന്ത്രി മോദിയുടെ പരേതയായ അമ്മയെ കോൺഗ്രസ് പരിഹസിച്ചു. ഒരു പാർട്ടി ഇത്രയും തരംതാഴ്ന്നത് കാണുന്നത് വേദനാജനകമാണ്. കോൺഗ്രസ് സ്ത്രീവിരുദ്ധമാണ്,” — എന്നാണ് അദ്ദേഹം എക്സിൽ കുറിച്ചത്.
