ന്യൂഡല്ഹി: ദീപാവലി ആഘോഷങ്ങൾക്ക് പിന്നാലെ രാജ്യതലസ്ഥാനമായ ഡല്ഹിയില് വായുവിന്റെ ഗുണനിലവാരം അതീവ മോശം അവസ്ഥയിൽ. സെൻട്രൽ പൊല്യൂഷൻ കൺട്രോൾ ബോർഡ് (CPCB) പുറത്തുവിട്ട റിപ്പോർട്ടുകൾ പ്രകാരം, നഗരത്തിലെ എയർ ക്വാളിറ്റി ഇൻഡക്സ് (AQI) നിലവിൽ ‘വളരെ മോശം’ (Very Poor) വിഭാഗത്തിലാണ്.
ഇന്ന് രാവിലെ എട്ട് മണിക്ക് ഡൽഹിയിലെ മൊത്തത്തിലുള്ള എ.ക്യു.ഐ 335 ആണ് രേഖപ്പെടുത്തിയത്. ദീപാവലിയോടനുബന്ധിച്ച് ആളുകൾ വലിയ തോതിൽ പടക്കം പൊട്ടിച്ചതാണ് അന്തരീക്ഷ മലിനീകരണം രൂക്ഷമാക്കിയതെന്ന് സി.പി.സി.ബി. അറിയിച്ചു. പടക്കം പൊട്ടിച്ചതിനെ തുടർന്ന് ശബ്ദമലിനീകരണവും പുകപടലവും രൂക്ഷമായി.
സ്ഥിതി ഗുരുതരം; മുന്നറിയിപ്പ് ‘അതീവ ഗുരുതരത്തിലേക്ക്’
ഡല്ഹിയിലെ വിവിധ നിരീക്ഷണകേന്ദ്രങ്ങളില് നടത്തിയ പരിശോധനയില് മിക്കയിടങ്ങളിലും എ.ക്യു.ഐ 300-ന് മുകളില് രേഖപ്പെടുത്തി. ആനന്ദ് വിഹാർ (414), വാസിർപുർ (407) എന്നിവിടങ്ങളിൽ സ്ഥിതി അതീവ ഗുരുതരമാണ്. വരും ദിവസങ്ങളിൽ മലിനീകരണം കൂടുതൽ വഷളായി ചൊവ്വാഴ്ചയോ ബുധനാഴ്ചയോ സ്ഥിതി ‘അതീവ ഗുരുതരമായ’ (Severe) വിഭാഗത്തിലേക്ക് എത്തുമെന്നാണ് വിദഗ്ധരുടെ മുന്നറിയിപ്പ്.
മലിനീകരണം രൂക്ഷമായ സാഹചര്യത്തിൽ ഡൽഹി-എൻ.സി.ആർ. മേഖലകളിൽ ഗ്രേഡഡ് റെസ്പോൺസ് ആക്ഷൻ പ്ലാനിന്റെ (GRAP) രണ്ടാംഘട്ടം ഞായറാഴ്ച പ്രാബല്യത്തിൽ വന്നു. പൊടി നിയന്ത്രിക്കാൻ റോഡുകളിൽ വാക്വം സ്വീപ്പിങ്, ഇലക്ട്രിക് ബസുകളുടെ പ്രോത്സാഹനം, മെട്രോ സർവീസുകളുടെ എണ്ണം വർദ്ധിപ്പിക്കൽ തുടങ്ങിയ നടപടികൾ ഇതിന്റെ ഭാഗമായി സ്വീകരിക്കും.
ഗ്രീൻ പടക്കങ്ങൾ മാത്രം; നിരോധനം മറികടന്ന് പടക്കംപൊട്ടിക്കൽ
ദീപാവലി ആഘോഷങ്ങളുടെ ഭാഗമായി ഡൽഹി-എൻ.സി.ആർ. മേഖലകളിൽ അന്തരീക്ഷ മലിനീകരണം കുറഞ്ഞ ‘ഹരിത പടക്കങ്ങൾ’ (Green Crackers) മാത്രം നിബന്ധനകളോടെ ഉപയോഗിക്കാനാണ് സുപ്രീം കോടതി അനുമതി നൽകിയിരുന്നത്. സാധാരണ പടക്കങ്ങളെക്കാൾ 30 ശതമാനം കുറവ് മലിനീകരണം മാത്രമേ ഇവ ഉണ്ടാക്കുന്നുള്ളൂവെന്നാണ് അവകാശവാദം.
എന്നാൽ, മുൻപ് പടക്കങ്ങളുടെ നിർമ്മാണം, വിൽപന, ഉപയോഗം എന്നിവയ്ക്ക് പൂർണ്ണ നിരോധനം നിലനിന്നിരുന്ന സാഹചര്യത്തിൽ പോലും, ദീപാവലി ദിനത്തിൽ രാവിലെ എട്ട് മുതൽ രാത്രി പത്ത് മണി വരെ മാത്രമാണ് പടക്കം ഉപയോഗിക്കാൻ അനുമതി നൽകിയിരുന്നത്. ഈ നിയന്ത്രണങ്ങൾ മറികടന്ന് പലയിടത്തും പടക്കങ്ങൾ പൊട്ടിച്ചതാണ് നിലവിലെ രൂക്ഷമായ വായു മലിനീകരണത്തിന് പ്രധാന കാരണം.
