മോഹൻലാലും പിണറായി വിജയനും ‘ഇരുവർ’ അഭിമുഖത്തിൽ; ജീവിതത്തിലെ പശ്ചാത്താപം, ആക്ഷൻ സിനിമകൾ ഇഷ്ടമെന്ന് മുഖ്യമന്ത്രി

ക്ലിഫ് ഹൗസിൽ ചിത്രീകരണം; നിയമസഭാ തിരഞ്ഞെടുപ്പിന് മുമ്പ് പുറത്തുവന്ന 1.15 മിനിറ്റ് ടീസർ ചർച്ചയായി

മോഹൻലാലും പിണറായി വിജയനും ‘ഇരുവർ’ അഭിമുഖത്തിൽ; ജീവിതത്തിലെ പശ്ചാത്താപം, ആക്ഷൻ സിനിമകൾ ഇഷ്ടമെന്ന് മുഖ്യമന്ത്രി.

അഭിമുഖത്തിന്റെ ടീസർ പുറത്തിറങ്ങി. ‘ഇരുവർ’ എന്ന പേരിലുള്ള അഭിമുഖത്തിന്റെ 1.15 മിനിറ്റ് ദൈർഘ്യമുള്ള ടീസറാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്.

‘കണ്ടും മിണ്ടിയും… ഇരുവർ. ജനങ്ങൾ നെഞ്ചിലേറ്റിയ, ജനങ്ങളെ നെഞ്ചിലേറ്റിയ രണ്ടുപേർ’ എന്ന ടാഗ്‌ലൈനോടെയാണ് ടീസർ എത്തിയത്.

മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസ് ആസ്ഥാനമായാണ് അഭിമുഖം ചിത്രീകരിച്ചത്. മോഹൻലാൽ ക്ലിഫ് ഹൗസിൽ എത്തുന്നതും ഇരുവരും അങ്കണത്തിൽ നടന്നും സംസാരിക്കുന്നതും ടീസറിൽ കാണാം.

മുഖ്യമന്ത്രിക്ക് ഇഷ്ടമുള്ള സിനിമകളെ കുറിച്ച് സംസാരിക്കുന്നതിനിടെ, പൊതുവെ ആക്ഷൻ ചിത്രങ്ങളാണ് തനിക്ക് ഇഷ്ടമെന്ന് പിണറായി വിജയൻ പറയുന്നു. ജീവിതത്തിൽ എന്തെങ്കിലും കാര്യത്തിൽ പശ്ചാത്തപിച്ചിട്ടുണ്ടോയെന്ന മോഹൻലാലിന്റെ ചോദ്യത്തിന് മറുപടിയായി തനിക്ക് മർദനം ഏൽക്കേണ്ടി വന്ന അനുഭവം അദ്ദേഹം പങ്കുവെക്കുന്നു.

താൻ അഭിനയിച്ച സിനിമകളിലെ സംഭാഷണങ്ങൾ ഓർമയുണ്ടോയെന്ന ചോദ്യത്തിന് ദിനേശനും ദാസനും ഉൾപ്പെടെ നിരവധി കഥാപാത്രങ്ങളെ പരാമർശിച്ച് മുഖ്യമന്ത്രി മറുപടി നൽകുമ്പോൾ, മോഹൻലാൽ പൊട്ടിച്ചിരിക്കുന്ന ദൃശ്യവും ടീസറിൽ ശ്രദ്ധേയമാണ്.

സംവിധായകൻ ടി.കെ. രാജീവ് കുമാർ ഉൾപ്പെടെയുള്ള സംഘമാണ് അഭിമുഖത്തിന്റെ പിന്നിൽ. രണ്ട് ദിവസങ്ങളിലായാണ് ചിത്രീകരണം നടന്നത്. ആദ്യദിവസം വിഷയങ്ങൾ ചർച്ച ചെയ്യുകയും അടുത്ത ദിവസം ചിത്രീകരണം നടത്തുകയും ചെയ്തു.

നിയമസഭാ തിരഞ്ഞെടുപ്പ് അടുത്തിരിക്കെ ഈ അഭിമുഖം പുറത്തുവന്നത് രാഷ്ട്രീയ ചർച്ചകൾക്കും വഴിവെച്ചിട്ടുണ്ട്. മുൻമുഖ്യമന്ത്രി ഉമ്മൻചാണ്ടിയുമായും മുമ്പ് മോഹൻലാൽ അഭിമുഖം നടത്തിയിട്ടുണ്ട്.

ജനപ്രിയ താരമായ മോഹൻലാൽ ഉൾപ്പെട്ടതിനാൽ ഈ അഭിമുഖത്തെ പ്രതിപക്ഷം എങ്ങനെ നേരിടും എന്നതാണ് രാഷ്ട്രീയ കൗതുകം.