ബംഗളൂരു: കൈനോട്ടം വിശ്വസിച്ച് 31 ലക്ഷം രൂപയുടെ ആഭരണങ്ങൾ നഷ്ടപ്പെട്ട സംഭവത്തിൽ ഇന്കംടാക്സ് ഉദ്യോഗസ്ഥൻ തട്ടിപ്പിന് ഇരയായി. ബംഗളൂരുവിലെ കോറമംഗള ഇന്കംടാക്സ് ഓഫീസിലെ സീനിയർ അഡ്മിനിസ്ട്രേറ്റീവ് ഓഫീസറായ 55-കാരൻ വി. സത്യനാരായണനാണ് തട്ടിപ്പിന് ഇരയായത്.
ഭാഗ്യം വർധിപ്പിക്കാനും ജോലിയിൽ സ്ഥാനക്കയറ്റം ലഭിക്കാനുമെന്ന പേരിലാണ് ഇയാൾ കൈനോട്ടക്കാരന് പണം നൽകിയത്.
2025 ഡിസംബറിലാണ് സത്യനാരായണൻ ശേഖർ എന്ന വ്യാജ ജ്യോത്സ്യനെ പരിചയപ്പെടുന്നത്. ഭാരതിനഗറിലെ ശ്രീ സർക്കിളിന് സമീപം സെന്റ് ജോൺസ് റോഡിന് സമീപം തത്തയുമായി ഇരുന്ന് ‘ഗിലി ശാസ്ത്രം’ നടത്തി ആളുകളുടെ ഭാവി പറയുന്നവനായി ഇയാൾ നടിച്ചിരുന്നു. മുഖം നോക്കി ജീവിതത്തിൽ പ്രതിസന്ധികൾ ഉണ്ടെന്നും അവ മാറാൻ പ്രത്യേക പൂജ വേണമെന്നും പറഞ്ഞ് ആദ്യം 50,000 രൂപ വാങ്ങി.
പിന്നീട് സ്ഥാനക്കയറ്റം ലഭിക്കാൻ കൂടുതൽ ശക്തമായ പൂജകൾ വേണമെന്നു പറഞ്ഞ് വീണ്ടും വിശ്വാസം നേടി. ഇതിന്റെ ഭാഗമായി വീട്ടിൽ നിന്ന് സ്വർണവും വെള്ളിയും കൊണ്ടുവരാൻ ആവശ്യപ്പെട്ടു. ഫെബ്രുവരി 20-ന് 194 ഗ്രാം സ്വർണവും 1.3 കിലോ വെള്ളിയാഭരണങ്ങളും സത്യനാരായണൻ ഇയാൾക്ക് കൈമാറി. സ്വർണം 28 ലക്ഷം രൂപയും വെള്ളി 3 ലക്ഷം രൂപയും ചേർത്ത് മൊത്തം 31 ലക്ഷം രൂപയാണ് ഇതിന്റെ മൂല്യം.
ചടങ്ങുകൾ പൂർത്തിയായാൽ ഒരു ദിവസത്തിനകം ആഭരണങ്ങൾ തിരികെ നൽകാമെന്ന് പറഞ്ഞെങ്കിലും പിന്നീട് വിവിധ കാരണങ്ങൾ പറഞ്ഞ് കൈനോട്ടക്കാരൻ വൈകിച്ചു. കുടുംബത്തിന് ദോഷം സംഭവിക്കുമെന്ന് ഭീഷണിപ്പെടുത്തുകയും ചെയ്തു.
താൻ പൂർണമായി കബളിപ്പിക്കപ്പെട്ടതായി മനസിലായതോടെ സത്യനാരായണൻ പൊലീസിൽ പരാതി നൽകി. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്.
