ബിജെപി ദേശീയ അധ്യക്ഷ സ്ഥാനത്തേക്ക് ദേവേന്ദ്ര ഫഡ്നാവിസ്, പുരുഷോത്തം രൂപാല, ധർമ്മേന്ദ്ര പ്രധാന എന്നിവർ പരിഗണനയിൽ. ആർഎസ്എസിന്റെ പിന്തുണയും ചെറുപ്പവും ഫഡ്നാവിസിന്റെ സാധ്യത വർധിപ്പിക്കുന്നു. പാർട്ടിയുടെ സംഘടനാപരമായ അഴിച്ചുപണി പൂർത്തിയായ ശേഷം തെരഞ്ഞെടുപ്പ് നടപടികൾ ആരംഭിക്കും.
ന്യൂഡല്ഹി: ബിജെപി ദേശീയ അധ്യക്ഷ സ്ഥാനത്തേക്ക് മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് ഉൾപ്പെടെ നിരവധി പേരുകൾ പരിഗണനയിൽ ഉള്ളതായി റിപ്പോർട്ടുകൾ. ഗുജറാത്തിൽ നിന്നുള്ള മുതിർന്ന നേതാവും മുൻ കേന്ദ്രമന്ത്രിയുമായ പുരുഷോത്തം രൂപാല, കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന എന്നിവരും പട്ടികയിൽ ഉൾപ്പെടുന്നു.
ബിഹാർ തിരഞ്ഞെടുപ്പിന് ശേഷം മഹാരാഷ്ട്ര മുഖ്യമന്ത്രി പദം ഒഴിയാൻ ഫഡ്നാവിസിനോട് കേന്ദ്രനേതൃത്വം നിർദേശം നൽകിയതായി ദി ന്യൂ ഇന്ത്യൻ എക്സ്പ്രസ് റിപ്പോർട്ട് ചെയ്യുന്നു. ചെറുപ്പം, സംഘടനാപരമായ കഴിവ്, ആർഎസ്എസിന്റെ പിന്തുണ എന്നിവ അദ്ദേഹത്തിന്റെ സാധ്യത വർധിപ്പിക്കുന്ന ഘടകങ്ങളായി കണക്കാക്കപ്പെടുന്നു.
പുതുതായി അധ്യക്ഷ സ്ഥാനത്തേക്ക് മുന്നോട്ട് വന്ന പേരാണ് പുരുഷോത്തം രൂപാല. ആർഎസ്എസിന്റെ ശക്തമായ പിന്തുണ ലഭിക്കുന്ന ഗുജറാത്ത് നേതാവായ രൂപാല, പ്രധാനമന്ത്രി നരേന്ദ്ര മോദിയുമായി അടുത്ത ബന്ധം പുലർത്തുന്നയാളാണ്. 2024 പൊതുതെരഞ്ഞെടുപ്പിനിടെ നടത്തിയ ക്ഷത്രിയ വിരുദ്ധ പരാമർശം അദ്ദേഹത്തിന്റെ രാഷ്ട്രീയജീവിതത്തിൽ വിവാദമുണ്ടാക്കിയിരുന്നുവെങ്കിലും, പാർട്ടിക്കുള്ളിലെ സ്വാധീനം നിലനിൽക്കുന്നുണ്ട്.
ഇതിനിടെ, ഏറെക്കാലമായി അധ്യക്ഷ സ്ഥാനത്തേക്ക് സാധ്യതകളുടെ പട്ടികയിൽ ഇടം നേടിയിരിക്കുന്നത് ധർമ്മേന്ദ്ര പ്രധാന ആണ്. ആർഎസ്എസ് അനുബന്ധ കുടുംബ പശ്ചാത്തലമുള്ള അദ്ദേഹം, കേന്ദ്ര നേതൃത്വത്തിന്റെ വിശ്വാസ്യത നേടിയ നേതാവാണ്.
പാർട്ടിയുടെ ദേശീയ അധ്യക്ഷ തെരഞ്ഞെടുപ്പിനുള്ള പ്രക്രിയ ഔദ്യോഗികമായി തുടങ്ങാൻ, 37 സംസ്ഥാന സംഘടനാ യൂണിറ്റുകളിൽ കുറഞ്ഞത് 50% യൂണിറ്റുകളിലെ സംഘടനാപരമായ അഴിച്ചുപണി പൂർത്തിയാക്കേണ്ടതുണ്ടെന്ന് റിപ്പോർട്ടുകൾ പറയുന്നു.
