തിരുവനന്തപുരം: വനിതാ എസ്ഐമാർ നൽകിയ പരാതിയെ തുടർന്ന് ഐപിഎസ് ഉദ്യോഗസ്ഥനെതിരെ പോഷ് നിയമപ്രകാരം അന്വേഷണം ആരംഭിച്ചു. അന്വേഷണ ചുമതല പൊലീസ് ആസ്ഥാനത്തെ എസ്.പി മെറിൻ ജോസഫിന് നൽകിയതായി ഡിജിപി ഉത്തരവിട്ടു.
സ്ത്രീകളുടെയും കുട്ടികളുടെയും പരാതികൾ അന്വേഷിക്കുന്ന ഡിഐജി അജിതാ ബീഗത്തിന് നൽകിയ പരാതിയിലാണ് നടപടി ആരംഭിച്ചത്. രഹസ്യപരമായി നടത്തിയ പ്രാഥമിക അന്വേഷണത്തിന് ശേഷം, പോഷ് നിയമപ്രകാരം അന്വേഷണം വേണമെന്ന് ഡിഐജി ഡിജിപിക്ക് ശുപാർശ ചെയ്തു.
രണ്ട് വനിതാ എസ്ഐമാരാണ് ഉദ്യോഗസ്ഥൻ മോശം പരാമർശങ്ങൾ അടങ്ങിയ സന്ദേശങ്ങൾ അയച്ചുവെന്ന് പരാതിപ്പെട്ടത്. ഇരുവരും മൊഴിയിലൂടെ പരാതിയിൽ ഉറച്ചുനിന്നു.
പരാതിയുടെ പകർപ്പ് പുറത്തുവിട്ടിട്ടില്ലാത്തതിനാൽ ആരോപണവിധേയനായ ഉദ്യോഗസ്ഥന്റെ പേര് വെളിപ്പെടുത്തിയിട്ടില്ല. എന്നാൽ, തെക്കൻ ജില്ലകളിലൊന്നിൽ ജില്ലാ പൊലീസ് മേധാവിയായി മുൻപ് സേവനമനുഷ്ഠിച്ച ഇയാൾ ഇപ്പോൾ തിരുവനന്തപുരം പൊലീസ് സേനയിൽ ഉയർന്ന സ്ഥാനത്താണെന്ന് വിവരം. ക്രമസമാധാന ചുമതലയുണ്ടായിരുന്ന സമയത്താണ് ഇയാൾ മോശമായി പെരുമാറിയതെന്നാണ് റിപ്പോർട്ട്.
അന്വേഷണ ചുമതലയുള്ള എസ്.പി മെറിൻ ജോസഫ് പൊലീസ് ആസ്ഥാനത്തെ വനിതാ പരാതി സെൽ അധ്യക്ഷയാണ്.
സംസ്ഥാന പൊലീസ് സേനയ്ക്ക് അപമാനമായി മാറിയ വിവാദത്തിൽ പുതിയ വാദവുമായി ഐപിഎസ് ഉദ്യോഗസ്ഥൻ എസ്പി വി.ജി. വിനോദ് കുമാർ. തനിക്കെതിരെ വനിതാ എസ്ഐമാർ ഗൂഢാലോചന നടത്തിയെന്നാണ് അദ്ദേഹം ഡിജിപിക്ക് നൽകിയ പരാതിയിൽ ഉന്നയിക്കുന്നത്.
വനിതാ എസ്ഐമാർക്ക് മോശമായ തരത്തിൽ സന്ദേശങ്ങൾ അയച്ചിട്ടില്ലെന്നും ജോലിയുടെ ഭാഗമായുള്ള സന്ദേശങ്ങളാണ് അയച്ചതെന്നും വിനോദ് കുമാർ വ്യക്തമാക്കി. “എസ്പി എന്ന നിലയിൽ ഡ്യൂട്ടി ആവശ്യത്തിനായി മാത്രമാണ് സന്ദേശങ്ങൾ അയച്ചത്. അത് തെറ്റായ രീതിയിൽ വ്യാഖ്യാനിച്ചാണ് പരാതി ഉയർന്നത്,” എന്നാണ് പരാതി.
പോഷ് ആക്ട് പ്രകാരമുള്ള അന്വേഷണം അവസാനിപ്പിക്കണമെന്നും, എസ്ഐമാർക്കെതിരായ ഗൂഢാലോചനയും പ്രത്യേകം അന്വേഷിക്കണമെന്നും വിനോദ് കുമാർ ആവശ്യപ്പെട്ടു.
മുൻ പത്തനംതിട്ട ജില്ലാ പൊലീസ് മേധാവിയായിരുന്നു വിനോദ് കുമാർ.
