വി.കെ. പ്രശാന്ത് പറഞ്ഞത് ശരിയോ? വാടകയിനത്തിൽ കിട്ടുമോ 25,000 രൂപ? ‘അതിവേഗ’ വിവരാവകാശ രേഖകൾ പുറത്ത്

തിരുവനന്തപുരം:

വട്ടിയൂർക്കാവിൽ എംഎൽഎ ഓഫിസ് പ്രവർത്തിക്കുന്ന കെട്ടിടത്തെച്ചൊല്ലി എംഎൽഎ വി.കെ. പ്രശാന്തും ഉടമ ശ്രീലേഖയും തമ്മിലുള്ള തർക്കം രൂക്ഷമാകുന്നതിനിടെയാണ് മറ്റൊരു വാദം കൂടി സമൂഹമാധ്യമങ്ങളിൽ വ്യാപകമായി പ്രചരിച്ചത്. എംഎൽഎമാർക്ക് ഓഫിസ് അലവൻസായി മാസം 25,000 രൂപ ലഭിക്കുന്നുണ്ടെന്നും, വാടകയിനത്തിൽ വി.കെ. പ്രശാന്ത് നൽകുന്നത് 872 രൂപ മാത്രമാണെന്നുമായിരുന്നു പ്രചാരണം.

ഈ ആരോപണം വി.കെ. പ്രശാന്ത് നിഷേധിച്ചെങ്കിലും, സമൂഹമാധ്യമങ്ങളിലെ ചർച്ചകൾ അവസാനിച്ചിരുന്നില്ല. ഇപ്പോഴിതാ ഇതുസംബന്ധിച്ച നിയമസഭാ സെക്രട്ടേറിയറ്റിന്റെ രേഖകൾ വിവരാവകാശ നിയമപ്രകാരം പുറത്തുവന്നിരിക്കുകയാണ്. കെ. ശ്രീകുമാർ എന്നയാൾ ഡിസംബർ 29ന് നൽകിയ അപേക്ഷയിലാണ് നിയമസഭാ സെക്രട്ടേറിയറ്റ് ഒറ്റ ദിവസം കൊണ്ടു ‘അതിവേഗ മറുപടി’ നൽകിയത്.

വട്ടിയൂർക്കാവ് എംഎൽഎയ്ക്ക് മണ്ഡലത്തിൽ ഓഫിസ് പ്രവർത്തിപ്പിക്കുന്നതിനായി വാടകയിനത്തിൽ 25,000 രൂപ നിയമസഭ നൽകുന്നുണ്ടോ എന്നതായിരുന്നു വിവരാവകാശ അപേക്ഷയിലെ പ്രധാന ചോദ്യം. ഇതിന് മറുപടിയായി, വാടകയിനത്തിൽ പ്രത്യേകമായി യാതൊരു തുകയും നൽകുന്നില്ലെന്നും, പകരം എല്ലാ സാമാജികർക്കും മണ്ഡലം അലവൻസായി മാസം 25,000 രൂപ വീതം നൽകുന്നുണ്ടെന്നുമാണ് നിയമസഭാ സെക്രട്ടേറിയറ്റ് വ്യക്തമാക്കുന്നത്.

എല്ലാ എംഎൽഎമാർക്കും ഒരേ പോലെ ഈ മണ്ഡലം അലവൻസ് ലഭിക്കുന്നുണ്ടെന്നും, ഇത് വാടകയ്ക്കായി മാത്രമല്ല, മണ്ഡലത്തിലെ ഓഫിസ് പ്രവർത്തനങ്ങൾക്കും അനുബന്ധ ചെലവുകൾക്കുമുള്ള അലവൻസാണെന്നും വിവരാവകാശ രേഖയിൽ വ്യക്തമാക്കുന്നു.

🔹 ഓഫിസ് ഇല്ലാത്ത എംഎൽഎമാരും ഉണ്ടായിരുന്നു

ഈ വിവാദവുമായി ബന്ധപ്പെട്ട് മുൻ എംഎൽഎമാരെ ഉൾപ്പെടെ ബന്ധപ്പെട്ട് നേരത്തേതന്നെ മനോരമ ഓൺലൈൻ വ്യക്തത വരുത്തിയിരുന്നു. ആദ്യകാലങ്ങളിൽ മണ്ഡലങ്ങളിൽ എംഎൽഎമാർക്ക് പ്രത്യേക ഓഫിസുകളുണ്ടായിരുന്നില്ല. ഭൂരിഭാഗം ജനപ്രതിനിധികളും സ്വന്തം വീടുകളെയോ പാർട്ടി ഓഫിസുകളെയോ ആണ് പൊതുജന സമ്പർക്കത്തിനായി ഉപയോഗിച്ചിരുന്നത്.

ആദ്യമായി എംഎൽഎ ഓഫിസ് ആരംഭിച്ചത് ആരാണെന്ന കാര്യത്തിൽ ഔദ്യോഗിക രേഖകളില്ല. എന്നാൽ മണ്ഡലത്തിന് പുറത്തു താമസിച്ചിരുന്ന എംഎൽഎമാരാണ് ജനങ്ങളെ കാണുന്നതിനായി ‘എംഎൽഎ ഓഫിസ്’ എന്ന സംവിധാനത്തിന് തുടക്കം കുറിച്ചതെന്നാണ് രാഷ്ട്രീയ നിരീക്ഷകനും കോൺഗ്രസ് നേതാവുമായ ചെറിയാൻ ഫിലിപ്പ് വ്യക്തമാക്കുന്നത്.

എംഎൽഎമാർ മണ്ഡലങ്ങളിൽ ഔദ്യോഗികമായി ഓഫിസുകൾ സജ്ജീകരിക്കാൻ തുടങ്ങിയത് പ്രധാനമായും 1990കളുടെ തുടക്കത്തിലാണെന്ന് വിലയിരുത്തപ്പെടുന്നു. മണ്ഡലത്തിലെ ഓഫിസ് പ്രവർത്തനങ്ങൾക്കും ജീവനക്കാരുടെ ചെലവുകൾക്കുമായി സർക്കാർ മണ്ഡലം അലവൻസ് അനുവദിച്ചു തുടങ്ങിയതോടെയാണ് ഓഫിസുകൾ വ്യാപകമായത്.

1951ലെ The Payment of Salaries and Allowances Act എന്ന നിയമത്തിൽ കാലാകാലങ്ങളിൽ വരുത്തിയ ഭേദഗതികളിലൂടെയാണ് ഇത്തരം സൗകര്യങ്ങൾ ഔദ്യോഗികമായി അംഗീകരിക്കപ്പെട്ടത്. മണ്ഡലത്തിലെ വികസന പ്രവർത്തനങ്ങൾ ഏകോപിപ്പിക്കാനും ജനങ്ങളുടെ പരാതികൾ സ്വീകരിക്കാനും പ്രത്യേക ഓഫിസ് സംവിധാനം അനിവാര്യമാണെന്ന നിലയിലാണ് സർക്കാർ ഈ അലവൻസുകൾ അനുവദിച്ചു തുടങ്ങിയത്.