കവടിയാർ കൊട്ടാരം കേന്ദ്രമാക്കി വലിയ ആഭരണ കവർച്ച കേസിൽ അന്വേഷണം ശക്തമാകുന്നു. മുൻകൂട്ടി കൃത്യമായി ആസൂത്രണം ചെയ്ത പദ്ധതിപ്രകാരമാണ് കോടികൾ വിലമതിക്കുന്ന സ്വർണാഭരണങ്ങൾ കവർന്നതെന്ന് പ്രത്യേക അന്വേഷണസംഘം കണ്ടെത്തി.
കവർച്ചയ്ക്ക് പിന്നിലുള്ളവർ കൊട്ടാരവുമായി അടുത്ത ബന്ധമുള്ളവരോ, അല്ലെങ്കിൽ കൊട്ടാരത്തിന്റെ അകത്തള ക്രമീകരണങ്ങളെക്കുറിച്ച് വ്യക്തമായ അറിവുള്ളവരോ ആകാമെന്ന സംശയമാണ് പൊലീസ് ഉയർത്തുന്നത്. സംഭവം നടന്നതായി കരുതുന്ന സമയത്തെ സിസിടിവി ദൃശ്യങ്ങൾ വീണ്ടെടുക്കാൻ സാധിക്കാത്തതും അന്വേഷണത്തിൽ ദുരൂഹത കൂട്ടിയിരിക്കുകയാണ്. ദൃശ്യങ്ങൾ ഇല്ലാതാക്കുന്നതിൽ തന്നെ കവർച്ചാസംഘത്തിന് പങ്കുണ്ടാകാമെന്നാണ് വിലയിരുത്തൽ.
ചെന്നൈയും ബംഗളൂരുവും ആസ്ഥാനമായ രാജകുടുംബാംഗങ്ങളെ വിളിച്ചു വരുത്തി ചോദ്യം ചെയ്യൽ തുടരുകയാണ്. ഇതിനകം ഇരുപതോളം പേരെ ചോദ്യം ചെയ്തു. ഫോണുകളുടെ കോള്ഡാറ്റയും പരിശോധിക്കാൻ അന്വേഷണസംഘം തീരുമാനിച്ചിട്ടുണ്ട്.
രണ്ട് കോടിയോളം രൂപ വിലവരുന്ന ആഭരണങ്ങളാണ് നഷ്ടമായതെന്നാണ് പരാതി. എന്നാൽ 2025 നവംബറിൽ തന്നെ മോഷണം നടന്നിട്ടുണ്ടെന്നാണ് സൂചനയുണ്ടെങ്കിലും പരാതി നൽകിയിരിക്കുന്നത് 2026 മാർച്ചിൽ മാത്രമാണ്. ഇത്രയും വൈകിയതിന്റെ കാരണം വ്യക്തമല്ലെന്ന് അന്വേഷണ ഉദ്യോഗസ്ഥർ പറയുന്നു.
കൊട്ടാരത്തിലെ മുതിർന്ന അംഗമായ അശ്വതി തിരുനാൾ ഗൗരി ലക്ഷ്മിഭായിയുടെ മുറിയിലെ അലമാരയിലെ ലോക്കറിൽ സൂക്ഷിച്ചിരുന്ന ആഭരണങ്ങളാണ് മോഷണം പോയത്. ഒരേ അലമാരയിലെ മറ്റൊരു അറയിൽ സൂക്ഷിച്ചിരുന്ന ആഭരണങ്ങൾ നഷ്ടപ്പെടാതിരുന്നതും സംശയം വർധിപ്പിക്കുന്നു.
150-ഓളം മുറികളുള്ള കൊട്ടാരത്തിന്റെ രണ്ടാം നിലയിലെ മുറിയിൽ കയറി കൃത്യമായ ലക്ഷ്യം കണ്ടാണ് മോഷണം നടന്നതെന്ന് പൊലീസ് വിലയിരുത്തുന്നു. സുരക്ഷാ ജീവനക്കാരും നിരീക്ഷണ സംവിധാനങ്ങളും ഉണ്ടായിരുന്നിട്ടും സംഭവം നടന്നത് അന്വേഷണസംഘത്തെയും കുഴക്കുകയാണ്.
ഇതിനിടെ, കൊട്ടാരത്തിൽ പ്രവർത്തിക്കുന്ന ജീവനക്കാരെ ഉപദ്രവിക്കരുതെന്ന ആവശ്യവും രാജകുടുംബം മുന്നോട്ടുവെച്ചിട്ടുണ്ട്. അതേസമയം, യൂട്യൂബർമാരടക്കം നിരവധി പേർ കഴിഞ്ഞ മാസങ്ങളിൽ കൊട്ടാരത്തിൽ എത്തിയിട്ടുണ്ടെന്ന വിവരവും പൊലീസ് പരിശോധിക്കുന്നു.
ശ്രീപത്മനാഭന്റെ ചിത്രം പതിച്ച സ്വർണപതക്കം, പവിഴമാല, നാഗപടമാല, സ്വർണ വളകൾ, പാദസരം തുടങ്ങി വിലപിടിപ്പുള്ള നിരവധി ആഭരണങ്ങളാണ് കവർന്നത്.
അന്വേഷണം പുരോഗമിക്കുമ്പോൾ, കൊട്ടാരത്തിനകത്തുള്ളവരുടെ പങ്ക് സംബന്ധിച്ച സംശയങ്ങൾ ശക്തമാകുകയാണ്.
