തര്ക്കങ്ങള് തീര്ക്കാന് അതിവേഗ നീക്കം; കോണ്ഗ്രസ് ആദ്യഘട്ട സ്ഥാനാര്ഥി പട്ടിക നാളെ, 32 പേര് പട്ടികയില്
ന്യൂഡല്ഹി:
കേരളത്തിലെ നിയമസഭാ തെരഞ്ഞെടുപ്പ് തീയതി പ്രഖ്യാപിച്ചതോടെ സ്ഥാനാര്ഥി പ്രഖ്യാപനം വേഗത്തിലാക്കാന് കോണ്ഗ്രസ് നീക്കം തുടങ്ങി. ആദ്യഘട്ടമായി 32 സ്ഥാനാര്ഥികളുടെ പട്ടിക നാളെ പ്രഖ്യാപിക്കുമെന്ന് പാര്ട്ടി വൃത്തങ്ങള് അറിയിച്ചു. രണ്ടാംഘട്ട പട്ടിക ബുധനാഴ്ച പുറത്തിറക്കാനാണ് തീരുമാനം.
സിപിഐയും സിപിഎമ്മും ഇതിനകം തന്നെ സ്ഥാനാര്ഥികളെ പ്രഖ്യാപിച്ചതിനാല് കോണ്ഗ്രസ് ഉള്പ്പെടെയുള്ള യുഡിഎഫ് ഘടകകക്ഷികള്ക്ക് സ്ഥാനാര്ഥി പ്രഖ്യാപനം വേഗത്തിലാക്കേണ്ട സാഹചര്യം ഉണ്ടായിരിക്കുകയാണ്. വിവിധ മണ്ഡലങ്ങളിലെ തര്ക്കങ്ങള് തീര്ത്ത ശേഷം പട്ടിക അന്തിമമാക്കാനാണ് കോണ്ഗ്രസ് നേതൃത്വം ശ്രമിക്കുന്നത്.
ഇതിനിടെ 26 ദിവസത്തിനുള്ളില് കേരളത്തിലെ ദുര്ഭരണം അവസാനിക്കുമെന്ന് എഐസിസി ജനറല് സെക്രട്ടറി K. C. Venugopal പ്രതികരിച്ചു. പ്രചാരണത്തിന് വളരെ കുറച്ച് ദിവസങ്ങളേ ലഭിക്കുന്നുള്ളുവെന്നും തിരഞ്ഞെടുപ്പ് കമ്മീഷന് സാധാരണയില് നിന്ന് വ്യത്യസ്തമായ രീതിയിലാണ് തീയതി പ്രഖ്യാപിച്ചതെന്നും അദ്ദേഹം പറഞ്ഞു.
മുസ്ലിം ലീഗുമായി സീറ്റ് ധാരണയില് പ്രശ്നങ്ങളില്ലെന്നും അവസാനഘട്ട ചര്ച്ചകള് പുരോഗമിക്കുകയാണെന്നും അദ്ദേഹം കൂട്ടിച്ചേര്ത്തു. ചില മണ്ഡലങ്ങളില് എംപിമാരെ മത്സരിപ്പിക്കുന്ന കാര്യം ഹൈക്കമാന്ഡ് പരിഗണിക്കുന്നതായും സൂചനകളുണ്ട്.
അതേസമയം യുഡിഎഫ് ഒറ്റക്കെട്ടായി തെരഞ്ഞെടുപ്പിനെ നേരിടുമെന്നും വമ്പിച്ച വിജയം നേടുമെന്നുമാണ് കോണ്ഗ്രസ് വര്ക്കിങ് കമ്മിറ്റി അംഗവും പ്രചാരണ സമിതി ചെയര്മാനുമായ Ramesh Chennithala പറഞ്ഞത്. കോണ്ഗ്രസ് സംസ്ഥാനത്തെ ഏറ്റവും ശക്തമായ പാര്ട്ടിയാണെന്നും സ്ഥാനാര്ഥികളെ പ്രഖ്യാപിച്ചതിന് ശേഷം പ്രവര്ത്തകര് മുഴുവന് ഒരുമിച്ച് പ്രചാരണരംഗത്ത് ഇറങ്ങുമെന്നും അദ്ദേഹം പറഞ്ഞു.
ഇതിനിടെ തിരുവനന്തപുരം സെന്ട്രല് സീറ്റുമായി ബന്ധപ്പെട്ട സ്ഥാനാര്ഥി ചര്ച്ചകളില് തര്ക്കമുണ്ടെന്ന് റിപ്പോര്ട്ടുണ്ട്. സ്ഥാനാര്ഥി നിര്ണയവുമായി ബന്ധപ്പെട്ട വിവരങ്ങള് അറിയിക്കുന്നില്ലെന്ന പരാതിയുമായി Shashi Tharoor ഹൈക്കമാന്ഡിനെ സമീപിച്ചിട്ടുണ്ടെന്നാണ് സൂചന.
അതേസമയം എല്ഡിഎഫ് മുന്നണിയിലെ സ്ഥാനാര്ഥികള് ഇതിനോടകം തന്നെ മണ്ഡലങ്ങളില് പ്രചാരണം ആരംഭിച്ചു. സ്ഥാനാര്ഥി പ്രഖ്യാപനത്തിന് പിന്നാലെ വിവിധ മണ്ഡലങ്ങളില് റോഡ് ഷോകള് സംഘടിപ്പിച്ച് സിപിഎം നേതാക്കള് പ്രചാരണരംഗത്ത് സജീവമായി.
ഏപ്രില് 9ന് സംസ്ഥാനത്ത് വോട്ടെടുപ്പ് നടക്കും. ചുരുങ്ങിയ ദിവസങ്ങള്ക്കുള്ളില് ശക്തമായ പ്രചാരണമാണ് എല്ലാ മുന്നണികളും ലക്ഷ്യമിടുന്നത്.
