ഡൽഹി: മ്യൂസിക് ലേബലായ Saregamaയുടെ പക്കലുള്ള ഗാനങ്ങളും ഈണങ്ങളും അനുമതിയില്ലാതെ ഉപയോഗിക്കുന്നതിൽ നിന്ന് സംഗീതസംവിധായകൻ ഇളയരാജയെ ഡൽഹി ഹൈക്കോടതി വിലക്കി. വിവിധ ഡിജിറ്റൽ സ്ട്രീമിംഗ് പ്ലാറ്റ്ഫോമുകളിൽ ഗാനങ്ങൾ സ്വന്തം പേരിൽ അപ്ലോഡ് ചെയ്തതാണ് നിയമനടപടിക്ക് കാരണമായത്. സരിഗമ ഫയൽ ചെയ്ത ഹർജി പരിഗണിച്ചാണ് കോടതി ഇടക്കാല ഉത്തരവ് പുറപ്പെടുവിച്ചത്.
ജസ്റ്റിസ് തുഷാർ റാവു ഗെഡേലയാണ് ഫെബ്രുവരി 13-ന് ഉത്തരവ് പുറപ്പെടുവിച്ചത്. Amazon Music, iTunes, JioSaavn തുടങ്ങിയ പ്ലാറ്റ്ഫോമുകളിൽ സരിഗമയുടെ പകർപ്പവകാശമുള്ള ഗാനങ്ങൾ അപ്ലോഡ് ചെയ്തതിനെത്തുടർന്നാണ് കമ്പനി കോടതിയെ സമീപിച്ചത്. ഗാനങ്ങളുടെ ഉടമസ്ഥാവകാശം തനിക്കാണെന്ന് ഇളയരാജ അവകാശപ്പെട്ടിരുന്നുവെങ്കിലും, ഇത് സരിഗമയുടെ പകർപ്പവകാശ ലംഘനമാണെന്ന് കോടതി നിരീക്ഷിച്ചു.
ഇളയരാജയുടെ നടപടി സരിഗമയ്ക്ക് നികത്താനാവാത്ത നഷ്ടമുണ്ടാക്കുമെന്ന വിലയിരുത്തലോടെയാണ് 134 ഗാനങ്ങൾ ഉപയോഗിക്കുന്നതിലും ലൈസൻസ് നൽകുന്നതിലും കോടതി വിലക്ക് ഏർപ്പെടുത്തിയത്. ഇളയരാജയോ അദ്ദേഹത്തിന്റെ ഏജന്റുമാരോ പങ്കാളികളോ സരിഗമയുടെ ഉടമസ്ഥതയിലുള്ള ഗാനങ്ങൾ ഉപയോഗിക്കാനോ മൂന്നാം കക്ഷികൾക്ക് ലൈസൻസ് നൽകാനോ പാടില്ലെന്നും കോടതി വ്യക്തമാക്കി.
1976 മുതൽ 2001 വരെ വിവിധ സിനിമാ നിർമ്മാതാക്കളുമായി ഉണ്ടായ കരാറുകൾ പ്രകാരം ഗാനങ്ങളുടെ പകർപ്പവകാശം തങ്ങൾക്കാണെന്ന് സരിഗമ വാദിച്ചു. 1957-ലെ പകർപ്പവകാശ നിയമപ്രകാരം, പ്രത്യേക കരാർ ഇല്ലെങ്കിൽ സിനിമാ നിർമ്മാതാവാണ് സിനിമയ്ക്കായി സൃഷ്ടിച്ച കൃതികളുടെ ആദ്യ ഉടമയെന്നും കമ്പനി കോടതിയിൽ വ്യക്തമാക്കി. ഈ വാദങ്ങൾ പരിഗണിച്ചാണ് ഇടക്കാല ഉത്തരവ്.
