നമ്മുടെ നിത്യജീവിതത്തിന്റെ ഭാഗമാണ് ഇന്ത്യൻ റെയിൽവേ സംവിധാനങ്ങൾ. കുറഞ്ഞ ചെലവിൽ ദീർഘദൂര യാത്രകൾ സാധ്യമാക്കുന്നു എന്നതാണ് ട്രെയിനുകളെ സാധാരണക്കാരുടെ പ്രിയപ്പെട്ട പൊതുഗതാഗത മാർഗ്ഗമാക്കുന്നത്. എന്നാൽ, ഇന്ത്യൻ റെയിൽവേ യാത്രക്കാർ നേരിടുന്ന ഏറ്റവും വലിയ വെല്ലുവിളികളിലൊന്ന് ട്രെയിനുകൾ മണിക്കൂറുകളോളം വൈകിയോടുന്നതാണ്. മണിക്കൂറുകളോളം പ്ലാറ്റ്ഫോമുകളിലും മറ്റും കാത്തിരിക്കേണ്ടി വരുന്നത് യാത്രക്കാരെ ഏറെ ബുദ്ധിമുട്ടിക്കാറുണ്ട്. എന്നാൽ, ട്രെയിൻ വൈകുമ്പോൾ പ്രീമിയം ട്രെയിനുകളിലെ യാത്രക്കാർക്ക് ചില പ്രത്യേക അവകാശങ്ങൾ ഐആർസിടിസി (IRCTC) നൽകുന്നുണ്ടെന്ന കാര്യം പലർക്കും അറിയില്ല.
രാജധാനി (Rajdhani), ശതാബ്ദി (Shatabdi), ദൂരന്തോ (Duronto) തുടങ്ങിയ പ്രീമിയം ട്രെയിനുകളിൽ യാത്ര ചെയ്യുന്നവർക്ക്, ട്രെയിൻ നിശ്ചിത സമയപരിധിയിലും കൂടുതൽ വൈകുകയാണെങ്കിൽ റെയിൽവേ സൗജന്യമായി ഭക്ഷണം നൽകാൻ ബാധ്യസ്ഥരാണ്.
സൗജന്യമായി ലഭിക്കുന്ന ഭക്ഷണങ്ങൾ എന്തെല്ലാം?
ട്രെയിൻ എത്ര സമയം വൈകുന്നു എന്നതിനെ അടിസ്ഥാനമാക്കിയാണ് യാത്രക്കാർക്ക് ലഭിക്കുന്ന ഭക്ഷണങ്ങൾ തീരുമാനിക്കുന്നത്.
രാവിലെയാണെങ്കിൽ: മോണിംഗ് ടീ, ലഘുഭക്ഷണം (Breakfast) എന്നിവ ലഭിക്കും.
ഉച്ചയ്ക്കോ വൈകുന്നേരമോ ആണെങ്കിൽ: ചായ/കാപ്പി, ബിസ്ക്കറ്റ്, വൈകുന്നേരത്തെ സ്നാക്സ് അല്ലെങ്കിൽ ഉച്ചഭക്ഷണവും അത്താഴവും യാത്രക്കാർക്ക് ലഭിക്കും.
കാപ്പി, ബിസ്ക്കറ്റ്, ബ്രെഡ്-ബട്ടർ, ഫ്രൂട്ട് ജ്യൂസ് എന്നിവ മുതൽ ചോറ്, പരിപ്പ് കറി, ചോലെ, രാജ്മ അല്ലെങ്കിൽ ചൂടുള്ള പൂരിയും മിക്സഡ് വെജിറ്റബിൾസും അടങ്ങുന്ന പോഷകസമൃദ്ധമായ വിഭവങ്ങൾ വരെ ട്രെയിൻ വൈകുന്ന വേളകളിൽ യാത്രക്കാർക്ക് സൗജന്യമായി വിതരണം ചെയ്യാറുണ്ട്.
യാത്ര വേണ്ടെന്ന് വെച്ചാൽ മുഴുവൻ തുകയും തിരികെ ലഭിക്കും
ഒരു ട്രെയിൻ മൂന്ന് മണിക്കൂറിൽ കൂടുതൽ വൈകുകയോ അല്ലെങ്കിൽ ട്രെയിൻ പൂർണ്ണമായും മറ്റൊരു റൂട്ടിലേക്ക് വഴിതിരിച്ചുവിടുകയോ ചെയ്യുമ്പോൾ യാത്ര പൂർണ്ണമായി ഉപേക്ഷിക്കാൻ യാത്രക്കാരൻ തീരുമാനിച്ചാൽ, ടിക്കറ്റ് റദ്ദാക്കി മുഴുവൻ പണവും (Full Refund) തിരികെ വാങ്ങാനുള്ള അവകാശമുണ്ട്.
ഓൺലൈൻ ടിക്കറ്റുകൾ: ഓൺലൈനായി എടുത്ത ടിക്കറ്റുകൾ റദ്ദാക്കിയാൽ അതിന്റെ തുക തടസ്സങ്ങളൊന്നുമില്ലാതെ നേരിട്ട് യാത്രക്കാരന്റെ ബാങ്ക് അക്കൗണ്ടിലേക്ക് തിരികെ എത്തും.
കൗണ്ടർ ടിക്കറ്റുകൾ: റെയിൽവേ സ്റ്റേഷൻ കൗണ്ടറിൽ നിന്ന് നേരിട്ട് വാങ്ങിയ പേപ്പർ ടിക്കറ്റുകൾ സ്റ്റേഷൻ കൗണ്ടറിൽ തന്നെ തിരികെ ഏൽപ്പിച്ച് പണം കൈപ്പറ്റാവുന്നതാണ്.
അടുത്ത തവണ പ്രീമിയം ട്രെയിനുകളിൽ യാത്ര ചെയ്യുമ്പോൾ ട്രെയിൻ വൈകിയാൽ ഈ അവകാശങ്ങൾ ഓർമ്മിക്കുക.
