തിരുവനന്തപുരം | 22 ജനുവരി 2026
സോണിയ ഗാന്ധിക്കെതിരെ കേരള നിയമസഭയിൽ മന്ത്രിമാർ നടത്തിയ അധിക്ഷേപ പരാമർശങ്ങൾ സഭാ രേഖകളിൽ നിന്ന് നീക്കം ചെയ്യണമെന്ന് ആവശ്യപ്പെട്ട് പ്രതിപക്ഷ നേതാവ് സ്പീക്കർക്കു കത്ത് നൽകി. ശബരിമല സ്വർണ്ണക്കൊള്ള വിഷയത്തിൽ ദേവസ്വം വകുപ്പ് മന്ത്രിയുടെ രാജി ആവശ്യപ്പെട്ട് പ്രതിപക്ഷം പ്രതിഷേധം നടത്തിയതിനിടെയാണ് മന്ത്രിമാർ വിവാദ പരാമർശങ്ങൾ നടത്തിയതെന്ന് കത്തിൽ പറയുന്നു.
പതിനഞ്ചാം കേരള നിയമസഭയുടെ പതിനാറാം സമ്മേളനത്തിനിടയിൽ, തദ്ദേശ സ്വയംഭരണ–എക്സൈസ്–പാർലമെന്ററി കാര്യ വകുപ്പ് മന്ത്രി എം.ബി. രാജേഷ്, പൊതുവിദ്യാഭ്യാസ–തൊഴിൽ വകുപ്പ് മന്ത്രി വി. ശിവൻകുട്ടി, ആരോഗ്യ–വനിത–ശിശു വികസന വകുപ്പ് മന്ത്രി വീണ ജോർജ് എന്നിവർ ഇന്ത്യൻ നാഷണൽ കോൺഗ്രസിന്റെ മുൻ ദേശീയ അധ്യക്ഷയും എം.പിയുമായ സോണിയ ഗാന്ധിക്കെതിരെ സഭാതലത്തിൽ അധിക്ഷേപകരമായ പരാമർശങ്ങളും ആരോപണങ്ങളും ഉന്നയിച്ചുവെന്നാണ് പ്രതിപക്ഷ നേതാവിന്റെ ആരോപണം.
കേരള നിയമസഭയുടെ നടപടിക്രമവും കാര്യനിർവഹണവും സംബന്ധിച്ച ചട്ടങ്ങളിലെ ചട്ടം 285 പ്രകാരം, സ്പീക്കർക്കു മുൻകൂട്ടി നോട്ടീസ് നൽകാതെ ഏതെങ്കിലും വ്യക്തിക്കെതിരെ അപകീർത്തികരമായോ കുറ്റം ചുമത്തുന്നതോ ആയ ആരോപണങ്ങൾ ഉന്നയിക്കാൻ പാടില്ലെന്ന് കത്തിൽ ചൂണ്ടിക്കാട്ടുന്നു. ഇത്തരത്തിൽ നോട്ടീസ് നൽകുമ്പോൾ ബന്ധപ്പെട്ട തെളിവുകളും ഉൾപ്പെടുത്തണമെന്നതാണ് നിയമസഭയിലെ നിലവിലുള്ള കീഴ്വഴക്കമെന്നും പ്രതിപക്ഷ നേതാവ് വ്യക്തമാക്കുന്നു.
സഭയിൽ ഉന്നയിക്കുന്ന ആരോപണങ്ങൾ തെളിവുകളുടെ അടിസ്ഥാനത്തിലായിരിക്കണമെന്നും, സഭയ്ക്ക് പുറത്തുള്ള വ്യക്തികളെ കുറിച്ചുള്ള ആരോപണങ്ങളിൽ കൂടുതൽ വ്യക്തമായ തെളിവുകൾ ആവശ്യമാണെന്നും വ്യക്തമാക്കുന്ന 1990 ജൂൺ 28 ലെ ചെയർ റൂളിംഗും, 1971 ഓഗസ്റ്റ് 20, 1973 മാർച്ച് 22, 1986 നവംബർ 20 തുടങ്ങിയ തീയതികളിലെ സമാന റൂളിംഗുകളും കത്തിൽ പരാമർശിക്കുന്നു.
ഈ ചട്ടങ്ങളും കീഴ്വഴക്കങ്ങളും ലംഘിച്ചുകൊണ്ട്, മുൻകൂർ നോട്ടീസ് നൽകാതെയാണ് മന്ത്രിമാർ സോണിയ ഗാന്ധിക്കെതിരെ അടിസ്ഥാനരഹിതമായ ആരോപണങ്ങൾ ഉന്നയിച്ചതെന്ന് പ്രതിപക്ഷ നേതാവ് ആരോപിച്ചു. കേരള നിയമസഭയിലെ അംഗമല്ലാത്തതും ദീർഘകാല ശുദ്ധമായ രാഷ്ട്രീയ പാരമ്പര്യമുള്ളതുമായ ഒരു ദേശീയ നേതാവിനെതിരെ നടത്തിയ പരാമർശങ്ങൾ ഗുരുതരമായ അച്ചടക്ക ലംഘനവും പാർലമെന്ററി മര്യാദകൾക്ക് നിരക്കാത്തതുമാണെന്നും കത്തിൽ പറയുന്നു.
ചട്ടം 307 പ്രകാരം മന്ത്രിമാരുടെ പരാമർശങ്ങൾ സഭാ രേഖകളിൽ നിന്ന് നീക്കം ചെയ്യണമെന്നും, അവയുടെ ദൃശ്യങ്ങൾ സഭാ ടി.വി. വഴി സംപ്രേഷണം ചെയ്യുന്നത് ഒഴിവാക്കണമെന്നും, ഇത്തരത്തിലുള്ള ചട്ടവിരുദ്ധ നടപടികൾ ആവർത്തിക്കരുതെന്ന് മന്ത്രിമാർക്ക് കർശന നിർദ്ദേശം നൽകണമെന്നും സ്പീക്കറോട് പ്രതിപക്ഷ നേതാവ് ആവശ്യപ്പെട്ടു.
