ആലപ്പുഴ: Vellappally Natesan മന്ത്രി K. B. Ganesh Kumarനെതിരെ കടുത്ത വിമർശനവുമായി രംഗത്തെത്തി. മന്ത്രിയുടെ പെരുമാറ്റം സർക്കാരിന്റെ പ്രതിച്ഛായയെ തകർക്കുന്നതാണെന്നും മന്ത്രിസഭയ്ക്കുതന്നെ ഇത് ഒരു “പുഴുക്കുത്ത്” ആണെന്നും വെള്ളാപ്പള്ളി ആരോപിച്ചു. വിഷയത്തിൽ മുഖ്യമന്ത്രി ഇടപെട്ട് തൃപ്തികരമായ തീരുമാനം സ്വീകരിക്കണമെന്നും അദ്ദേഹം ആവശ്യപ്പെട്ടു.
മന്ത്രിസ്ഥാനത്തിരിക്കുമ്പോൾ നിലവാരം പുലർത്താൻ ബാധ്യതയുണ്ടെന്നും, ഇത്രയും വഷളായ രീതിയിൽ പെരുമാറിയ മറ്റൊരു മന്ത്രി ഉണ്ടായിട്ടില്ലെന്നും വെള്ളാപ്പള്ളി പറഞ്ഞു. “അദ്ദേഹത്തിന് പെണ്ണിനോടും പൊന്നിനോടും ഏറെ ഇഷ്ടമാണ്. കനകസിംഹാസനത്തിൽ കയറിയിരിക്കുന്ന ഇവൻ ശുംഭനോ ശുനകനോ ആണെന്ന് ആരെങ്കിലും പറഞ്ഞാൽ അത് തെറ്റാണെന്ന് പറയാൻ കഴിയില്ല,” എന്നും അദ്ദേഹം വിമർശിച്ചു.
ഭാര്യ പരാതി പിൻവലിച്ചതുകൊണ്ട് കാര്യമായില്ലെന്നും പൊതുപ്രവർത്തകനെന്ന നിലയിൽ കാണിക്കേണ്ട മാന്യതയും മര്യാദയും മന്ത്രി കാട്ടിയില്ലെന്നും വെള്ളാപ്പള്ളി ആരോപിച്ചു. ഭംഗിയായി ഭരണം നടത്തിക്കൊണ്ടിരിക്കുന്ന മന്ത്രിസഭയ്ക്ക് ഗണേശ് കുമാർ ഒരു പുഴുക്കുത്താണെന്നും, അദ്ദേഹത്തിന്റെ വാക്കുകളിലും പ്രവൃത്തികളിലും ദാർഷ്ട്യവും മാടമ്പിത്തരവുമാണെന്നും വെള്ളാപ്പള്ളി കൂട്ടിച്ചേർത്തു.
“അയ്യായിരം പേരെ പ്രണയിക്കുന്നുവെന്ന് തലയിൽ ആൾത്താമസമുള്ള ഒരാൾ പറയുമോ? അങ്ങനെ അല്ലാത്തവർ പൊട്ടന്മാരും ഷണ്ഡന്മാരുമാണെന്നുമാണ് പറയുന്നത്. ഭാര്യ പരാതി പിൻവലിച്ചെന്നത് കൊണ്ട് കേസ് ഇല്ലാതാകുന്നില്ല,” എന്നും അദ്ദേഹം പറഞ്ഞു.
ഇതിനിടെ, G. Sudhakaran സംബന്ധിച്ച വിഷയത്തിലും വെള്ളാപ്പള്ളി പ്രതികരിച്ചു. ജി. സുധാകരന് സീറ്റ് നൽകേണ്ടിയിരുന്നുവെന്നും അദ്ദേഹം ജനസ്വാധീനമുള്ള നല്ല നേതാവാണെന്നും വ്യക്തമാക്കി. പാർട്ടി അദ്ദേഹത്തിന്റെ പരാതികൾ കേട്ട് പ്രശ്നങ്ങൾ പരിഹരിക്കണമെന്നും, യുഡിഎഫിലേക്ക് പോകുന്നത് ആത്മഹത്യാപരമായ തീരുമാനമാകുമെന്നും വെള്ളാപ്പള്ളി പറഞ്ഞു.
